अविश्वासया प्रस्ताव दर्ता यायेत माओवादीयात हाथ्या
सहमति मजूसाः माओवादी विरुद्ध कारवाही : मन्त्री खाँड
उपप्रधानमन्त्री नापं भौतिक योजनमन्त्री विजयकुमार गच्छदारं प्रमुख प्रतिपक्षी दल एकीकृत नेकपा (माओवादी)यात वर्तमान सरकारया विरुद्ध अविश्वासया प्रस्ताव दर्ता यायेत हाथ्या बियादीगु दु ।
सोमवाः नवलपरासीलय् निर्माण यायेत्यंगु छगू पुलया शिलन्यास यानादिसें वयेकलं वर्तमान सरकार छुं नं हालतं क्वमदलीगु दाबी यानादिसें फुसाः सरकार विरुद्ध अविश्वासया प्रस्ताव दर्ता यायेत माओवादीयात हाथ्या बियादिल । वयेकलं थ्वहे सरकारं शान्ति प्रकृया व संविधान निर्माणया ज्या पूवंकीगु दाबी नं यानादिल । अथेहे वयेकलं माओवादीयात हैसियत कथं मन्त्रालय कयाः वर्तमान सरकारय् ब्वति कायेत नं इनाप यानादिल ।
उखे सिंचाई मन्त्री बालकृष्ण खाँडं माओवादी तत्काल सहमतिलय् मवसाः सरकारया ज्याखँ न्ह्याकेत माओवादी विरुद्ध बल छ्यलीगु ख्याच्वः बियादीगु दु ।
सोमवाः झापाया बिर्तामोडय् जूगु पत्रकार नापलायेगु ज्याझ्वलय् मन्त्री खाँडं राजनीतिक गतिरोध ज्यंकेत सरकारं तसकं लचकता प्रदर्शन याःगु व आः माओवादीया निंतिं थप लचकता क्यनीगु थाय् मदुगु धयादिल ।
वयेकलं माओवादीं अलोकतान्त्रिक ज्या त्याग मयासाः सरकार नाप शक्ति प्रदर्शया विकल्प मदुगु धयादिल । नागरिक सर्वोच्चताया खँ ल्ह्वनाः माओवादीं सरकार हिलेत स्वयाच्वंगु धयादिसें वयेकलं संविधान निर्माण यायेगु ज्या त्व:ता माओवादी सत्ता प्राप्ति व सर्वसत्ता लादे यायेत लगेजुयाच्वंगु द्वपं बियादिल ।
