माओवादीयात लिप्पांगु पटक सहमतिलय् वयेत इनाप याइगु
सत्तारुढ नेपाली कांग्रेस व नेकपा (एमालें) सहमतिलय् वयेत एकीकृत नेकपा (माओवादी)यात लिप्पांगु पटक इनाप याइगु जूगु दु ।
सोमवाः एमाले पार्टी ज्याकू बल्खुइ च्वंगु निगू दलया बैठकं माओवादीं पटक पटक थःगु खँ हिचाच्वंगु व सहमति पाखें बिस्यूं वनाच्वंगुलिं लिप्पांगु पटक सहमतिया निंतिं इनाप यायेगु निर्णय याःगु खः । निगू दलया बैठकं माओवादीयात विधि सम्मत ढंगं सरकारय् ब्वति कायेत इनाप यायेगु निर्णय नं याःगु दु । अथेहे सत्तारुढ दलतय्सं सहमतिया निंतिं माओवादीयात लचकता क्यनेत इनाप याःगु दु ।
बैठक लिपाः संचारकर्मीत नाप खँल्हाबंला यानादिसें कांग्रेस संसदीय दलया नेता रामचन्द्र पौडेलं बहुमतं याःगु निर्णययात अल्पमतय् च्वनीपिंसं माने यायेमाःगु खँ धयादिल । वयेकलं दलत दथुइ सहमति मजूसाः राज्य असफल जुइगुलिं माओवादीयात सहमतिलय् वयेत नं इनाप यानादिल ।
अथेहे एमाले महासचिव ईश्वर पोखरेलं माओवादीयात विद्रोह याये स्वयां न्ह्यः थुकीया लिच्वः बारे न्हापा बिचाः यायेत इनाप यानादिल ।
निगू सत्तारुढ दलत दथुइ जूगु निर्णय सोमवाः हे च्वनीगु सत्ता गठबन्धन नीनिगू दलया बैठकय् पेश याइगु जूगु दु ।
