माओवादी प्रस्ताव कांग्रेस व एमाले पाखें अस्वीकार
एकीकृत नेकपा (माओवादीं) मंकाः सहमतिया निंतिं न्ह्यने हःगु प्रस्तावयात नेपाली कांग्रेस व नेकपा (एमालें) अस्वीकार याःगु दु ।
आइतवाः माओवादी व एमालेया बैठक लिपा एमालें कांग्रेस नाप याःगु बैठकं थज्याःगु निर्णय याःगु खः । आइतवाः सहमतिया निंतिं माओवादी नाप कांग्रेस व एमालें बिस्कं बिस्कं खँल्हाबंला याःगु खसाः एमाले व कांग्रेस नं बिस्कं हे खँल्हाबंला याःगु खः ।
खँल्हाबंला लिपा एमाले नेता केशव बडालं माओवादीं मंकाः सहमतिया नामय् सरकार परिवर्तन व राष्ट्रपतिया पलाः भिंकेमाःगु सम्बन्धि हःगु प्रस्ताव छुं नं हालतं स्वीकार्य मजूगु धयादिल । अथेहे कांग्रेस प्रवक्ता अर्जुननरिसंह केसीं माओवादीं हःगु सहमतिया प्रस्तावय् मंकाः सहमति स्वयां नं सरकार परिवर्तन मुख्य उदेश्य कथं खनेदुगुलिं सहमतिया कुतःया छुं अर्थ मदुगु धयादिल ।
माओवादीया उपाध्यक्ष नारायणकाजि श्रेष्ठ 'प्रकाशं' धाःसाः सहमतिया कुतः सकारात्मक जूगु टिप्पणी यानादिल ।
कांग्रेस व एमालें राष्ट्रपतिया पलाःया बारे मेगू खँय् थःपिं सहमति यायेत तयार जूगु खँ धयाच्वंगु दुसाः माओवादी राष्ट्रपतिया पलाः भिंकेमाःगु अडान कयाच्वंगु दु । थुकीया हे बारे सहलह यायेत सोमवाः सरकार समर्थित दलतय् सर्वदलीय बैठक च्वनीगु जूगु दु ।
