क्रान्तिकारीया आक्रमणय् लानाः क्याम्पस प्रमुख घाःपाः
एकीकृत नेकपा (माओवादी) निकट अनेरास्ववियु क्रान्तिकारी समर्थित विद्यार्थीतय्सं भोजपुर बहुमुखी क्याम्पस प्रमुख पर्वतकुमार राईयात आक्रमण यानाः घाःपाः यानाब्यूगु दु । घाःपाः जुम्ह राईयात आः भोजपुर जिल्ला अस्पतालय् वासः याकातःगु दु । घाःपाः जुम्ह राईया छ्यँ तज्याःगु दुसाः छ्यँनय् नीखुगू टाका तयात:गु दु ।
क्रान्तिकारी जिल्ला अध्यक्ष सुनिता राईया नेतृत्वय् वःपिं झिंन्याम्हया पुचलं आइतवाः क्याम्पस दुने दुहांवनाः राईयात आक्रमण याःगु खः । घटना लिपाः क्रान्तिकारीया जिल्ला अध्यक्ष सुनिता राई थःहे वनाः प्रहरी समक्ष गिरफतारी ब्यूगु खः । तर सुनाति नापं वःपिं मेपिंत धाःसा ज्वनेफुगु मदुनी ।
प्रत्यक्षदर्शीतय् कथं बुधवाः निसें न्ह्यानाच्वंगु स्नातक व प्रविणत प्रमाण पत्र तहया परीक्षाया तयारीया निंतिं प्राध्यापकत दथुइ सहलह जुयाच्वंगु ईलय् कोठा दुने वयाः खुकुरी, रड आदिं राईयात आक्रमण याःगु खः ।
थ्वस्वयां न्ह्यः क्रान्तिकारी समर्थक विद्यार्थीतय्सं क्याम्प प्रमुखया राजीनामा माग यासें क्यम्पस प्रमुख विरुद्ध नाराबाजी यानावयाच्वंगु खः । क्याम्पस कर्मचारीत ल्ययेगु ज्याय् पक्षपात जूगु द्वपं बियाः क्रान्तिकारी विद्याथीतय्सं खुलाः न्ह्यः निसें आन्दोलन यानावयाच्वंगु दु ।
क्याम्पस प्रमुखयात क्रान्तिकारीतय्सं याःगु आक्रमणयात कयाः मानव अधिकारया निंतिं नागरिक समाज, भोजपुर क्याम्पस प्रध्यापक संघ, त्रिवि कर्मचारी युनियन लगायत थीथी संघ संस्थां भर्त्सना याःगु दु ।
