ने.सं. यात सभामुखया समर्थन
येँ (सन्ध्या टाइम्स)/संविधानसभाया सभामुख सुभाष नेम्बाङं नेपाल संवत्यात राष्ट्रिय संवत् धायेधुंकाः थुकियात व्यवहारय् नं लागू याकेमाः धइगु मागयात थःगु नं समर्थन दु धयादीगु दु। नेवाः जागरण मञ्चपाखें म्हिगः याःगु न्हूदँया तुच्चा ज्याझ्वलय् न्ववासें वय्कलं थ्व खँ धयादीगु खः ।
एनेकपा (माओवादी)या उपाध्यक्ष नारायणकाजी श्रेष्ठं नेपाल संवत्यात व्यवहारय् लागू याकेगु गुगुं नं ज्याय् माओवादीं ग्वाहालि याइ धयादिल। नेवाः देय् दबूया संरक्षक मल्ल के. सुन्दरं संसदया नियमित बैठकय् नं नेपाल संवत् छ्यलेत माग यानादिल ।
मञ्चया संयोजक सुजीव वज्राचार्यया सभापतित्वय् जूगु उगु ज्याझ्वलय् सचिव विजय कृष्ण श्रेष्ठं लसकुस यानादीगु खः। ज्याझ्वलय् थीथी पार्टीया नेतातय् नं उपस्थिति दुगु खः ।
