प्रचण्डया छेँय् अनमिन प्रमुख
येँ (सन्ध्या टाइम्स)/ सरकारय् दुथ्याःपिंसं हे सेना समायोजन बारे गलत धापू न्ववानाच्वंगुलिं माओवादीयात सशंकित दयेकूगु खँ माओवादी अध्यक्ष प्रचण्डं धयादीगु दु।
थौं सुथय् अध्यक्ष प्रचण्डयात नापलायेत वय्कःया निवास नया बजारय् थ्यंम्ह अनमिन प्रमुख करिन लेनग्रीनलिसे खँ ल्हायेगु झ्वलय् वय्कलं उगु आशंका प्वंकादीगु खः ।
अध्यक्ष प्रचण्डयात नापलायेगु झ्वलय् अनमिन प्रमुख लेनग्रीनं सुरक्षा परिषदय् दुथ्याःपिं राजदूतत सहित थम्हं यानागु नेपाली सेनाया छाउनीया निरीक्षण व इलामय् च्वंगु माओवादी शिविरया निरीक्षण बारे जानकारी याकूगु खः।
खँल्हाबल्हाया झ्वलय् लेनग्रीनं माओवादीया अयोग्य लडाकुतय्त व्यवस्थापन यायेगु ज्याय् ग्वाहालि यायेत नं प्रचण्डयात इनाप यानादीगु खः। अथे हे वय्कःपिनि दथुइ निर्धारित इलय् हे सेना समायोजन प्रक्रिया क्वचायेकेगु बारे नं सहलह जूगु खः ।
थौं हे अनमिन प्रमुख लेनग्रीनं एमालेया अध्यक्ष झलनाथ खनालयात नं नापलानाः सहलह यानादीगु दु ।
अनमिन प्रमुख लेनग्रीन संयुक्त राष्ट्रसंघया सुरक्षा परिषदया बैठकय् ब्वति कायेत कन्हय् न्यूयोर्क झायेत्यंगु दु। अन वय्कलं नेपाःया सुरक्षा स्थितियात कयाः थःगु प्रतिवेदन न्ह्यब्वयादी ।
