हाकुगु ध्वाँय् क्यनेथाय् हानं ल्वापु
येँ (सन्ध्या टाइम्स)/दांगया तुलसीपुरय् प्रहरी व माओवादी कार्यकर्ता दथुइ ल्वापु जुयाः छगू दर्जनं मल्याक कार्यकर्ता घाःपाः जूगु दु। थौं सुथय् कृषि विकास बैंकिङ्ग कार्यालयया ज्याकू उलेज्या यायेत वंम्ह सूचना तथा सञ्चारमन्त्री शंकर पोखरेलयात हाकुगु ध्वाँय् क्यनेगु कुतः जुइवं निथ्वःसिया दथुइ उगु ल्वापु जूगु खः ।
ल्वापुया झ्वलय् माओवादी कार्यकर्तातय्सं ज्याकू उलेज्या यायेत तयातःगु ब्यानर नं खुना बिउगु दु। थुकिं यानाः न्हिनय् अनया स्थिति तनावपूर्ण जूवंगु खः ।
थ्वहे झ्वलय् सञ्चारमन्त्री पोखरेलं माओवादीं धयाच्वंगु नागरिक सर्वोच्चता सरकारयात गुगुं नं हालतय् मान्य मजुइगु खँ धयादीगु दु। थौं सुथय् पत्रकारतलिसे खँ ल्हायेगु झ्वलय् वय्कलं उगु खँ धयादीगु खः। लिसें वय्कलं माओवादीयात आन्दोलन त्वःताः संविधान दयेकेगु ज्याय् वयेत नं इनाप यानादीगु दु ।
