नेवाः प्रदेश केन्द्र शासित जुइ मखु: प्रचण्ड
येँ (सन्ध्या टाइम्स)/एनेकपा (माओवादी) या अध्यक्ष प्रचण्डं नेवाः स्वायत्त प्रदेशयात केन्द्र शासित प्रदेश दयेकेगु धकाः थम्हं गबलें मधयागु खँ कनादीगु दु। नेवाः प्रदेश नेपाःया हे छगू महत्वपूर्ण प्रदेश जूगु कारणं थुकियात बल्लाकेगु लागिं केन्द्रपाखें नं विशेष पहल जुइमाः धयाथाय् पदावली उखेथुखे जुयाः मेगु हे अर्थ जूवंगुलिं सुं नं मनू थुकी भ्रमित मजुइत नं वय्कलं इनाप यानादीगु दु। नेवाः राष्ट्रिय मुक्ति मोर्चापाखें शुक्रवाः कोपुण्डोलय् ग्वसाः ग्वःगु न्हूदँया तुच्चा ज्याझ्वलय् न्ववासें वय्कलं थ्व खँ धयादीगु खः। ज्याझ्वलय् नेपाः राष्ट्रिय पार्टीया अध्यक्ष डा. केशवमान शाक्य व मंकाः खलःया नायः पद्मरत्न तुलाधरं नं न्ववानादीगु खः ।
