खोनाय् न्हूदँ तःजिक हन
यल (सन्ध्या टाइम्स)/ खोनाया लिधंसा पुचःया ग्वसालय् न्हूदँ नेसं ११३० या लसताय् छगू बृहत र्याली यासें हन। नेपाः राष्ट्रिय पार्टीया नायः डा. केशवमान शाक्य मूपाहां कथं झायादीगु उगु र्यालीइ पार्टीया मू छ्यान्जे विजय सैंजू विशेष अतिथि कथं ब्वति कयादिउगु खः ।
लिधंसा पुचःया नायः शरण डंगोलया सभापतित्वय् जूगु ज्याझ्वलय् पुचःया छ्याञ्जे ब्वति काःपिंत लसकुस यानादीगु खः ।
मूपाहां डा. केशवमान शाक्यं रिवन चानाः र्याली न्ह्याकूगु खः। उगु र्याली खोनाया थीथी झिंप्यम्ह द्यःतय्त म्हपुजा यायां देय् चाःहिउगु खः ।
खोनाया थीथी थाय् चाःहिलाः जूगु सभाय् न्ववासें नेपाः मूपाहां डा. केशवमान शाक्यं नेवाः एकतां हे नेवाः स्वशासन हये फइगु खँ कनादिल। उगु सभाय् च्यागू दलया प्रतिनिधि, स्थानीय बुद्धिजीवी, ज्यापु महागुथिया मू छ्याञ्जेपिंस थःथःगु नुगः खँ प्वंकादीगु खः ।
ज्याझ्वलय् लिधंसा पुचःपाखें नीस्वंगु अक्षय् कोषयात नेपाः राष्ट्रिय पार्टी पाखें ५००१ तका दां ग्वाहालि बीगु घोषणा पार्टीया मूछ्यान्जे विजय सैंजुं यानादिल ।
अथे हे नेवाः दे दबूया केन्द्रीय दुजः जितेन्द्र विलास बज्राचार्यं ५,००० तका देय् दबूपाखें बीगु घोषणा यानादिल। अथे हे थीथी व्यक्तिपिंसं नं अक्षय कोषया निंतिं ग्वाहालि यानादीगु खः ।
