टिष्टुङ्गय् नं न्हूदँ र्याली पिदन
येँ (सन्ध्या टाइम्स)/ नेपाल संवत् न्हूदँ ११३० या लसताय् मकवानपुरया बज्रवाहारी टिष्टुङ्गय् नेवाः पुचः (येँ) या ग्वसालय् टिष्टुङ्गय् छगू वृहत भिंतुना र्याली जुल।
उगु र्यालीं टिष्टुङ्गया वडा १, २, ६, ७ दुगु थीथी नेवाः खलः पुचलं बाजं सहित ब्वति काःगु खः। अनया सरस्वती बजारं न्ह्याःगु र्याली थीथी थाय् चाःहिलाः सरस्वती ख्यलय् थ्यंकाः छगू सभा याःगु खः ।
टिष्टुङ्ग वज्रवाराही नेवाः पुचःया नायः विनोद महर्जनया सभापतित्वय् जूगु उगु ज्याझ्वलय् विष्णु गोपाली, चित्रबहादुर बलामी, रत्नमान गोपाली इन्द्रबहादुर श्रेष्ठपिंसं नेपाल संवत्या महत्व व नेवाः स्वशासनया निंतिं नेवाः एकताया बारे ध्वाथुइकादीगु खः ।
चन्द्रबहादुर गोपलीं लसकुस यानाः न्ह्याःगु ज्याझ्वलय् कन्हय् नेवाः राष्ट्रिय मुक्ति मोर्चां नेपाःया ग्वसालय् स्वायत्त राज्यया सिमांकन यायेगु निंतिं येँया बसन्तपुरं न्ह्याकीगु मोटरसाइकल र्यालीया बारे नं जानकारी याकूगु खः।
हूदँ ११३० या हे झ्वलय् थौं नेवाः राष्ट्रिय मुक्ति मोर्चां थःगु मू ज्याकु कुपण्डोलय् भिंतुना कालबिल व तुच्चा ज्याझ्वःया ग्वसाः ग्वयातःगु दु। उगु ज्याझ्वलय् नेवाः भाषिक नेता कार्यकर्ताया लिसें थीथी राजनीतिक व्यक्तित्वयात नं ब्वनातःगु दु ।
