नेप्से कुहां वयेगु क्रम जारी
येँ (सन्ध्या टाइम्स)/थुगु वालय् स्वन्ति नखःया कारणं नेपाल स्टक एक्सचेन्जय् निन्हु जक नियमित शेयर कारोबार जुल। थ्व निन्हुया दुने नेप्से शुन्य दशमलव शुन्य ५ अंकं कुहां वःगु दु। थ्व वालय् ६०१ दशमलव २१ अंकं शुरु जूगु शेयर कारोबार लिपांगु न्हि ६०१ दशमलव १६ अंकय् थ्यंकाः बजाः बन्द जूगु खः ।
निन्हुया दुने नं स्टक एक्सचेन्जय् ख्वीन्हय्गू कम्पनीया १४६७ कारोबारं न्हय्गू करोड स्वीनिगू लाख स्वीनिद्वः तका दां बराबरया छगू लाख नीछद्वः व गुसः कित्ता शेयर न्याये-मी जुल। थ्वयां न्ह्यःया वालय् ३८७४ कालबिलं स्वीन्हय्गू करोड छगू लाख व स्वछद्वः तका दांया झिंन्यागू लाख चय्गुद्वः व स्वसः कित्ता शेयर न्याये-मी जूगु खः ।
थ्व वालय् 'क' वर्गय् लाःगु कम्पनीया जक प्यंगू करोड झिंस्वंगू लाख तका बराबरया कारोबार जुल। थ्व नेप्सेय् जूगु कूल कारोबारया ५६ दशमलव ४८ प्रतिशत खः। अथे हे थ्व वालय् जूगु निन्हु जकया कारोबारं सेन्सेटिभ इन्डेक्स नं कुहां वंगु दु। सेन्सेटिभया कारोबार १५१ दशमलव ७९ अंकं शुरु जूगु खःसा शुन्य दशमलव शुन्य २ अंकं कुहां वनाः १५१ दशमलव ७७ अंकय् थ्यंकाः बजाः बन्द जुल ।
थ्व वालय् कारोबार याःगु कम्पनी मध्ये दकलय् अप्वः ग्वीनिगू लाख तका दां व झिंन्हय्द्वः कित्ता शेयर कारोबार याःगु लिधंसाय् नेपाल दूरसंचार कम्पनी व दकलय् अप्वः निसः व न्यय्प्यंगू कारोबार याःगु लिधंसाय् पशपति डेभलपमेण्ट बैंक न्ह्यःने लाःगु दु ।
नेपाल स्टक एक्सचेन्जय् थ्व वालय् विकास ऋणपत्र २०७१ ख व विकास ऋणपत्र २०७३ क या सरकारी ऋणपत्र सुचीकृत जूगु दु ।
