संविधान निर्माणया निंतिं माओवादी व एमालेया कार्यदल
सत्तारुढ नेकपा (एमाले) व प्रमुख प्रतिपक्षी दल एकीकृत नेकपा (माओवादी) दथुइ संविधान निर्माणया झ्वलय् खनेदुगु जटिलता समाधान यायेत छगू कार्यदल निर्माण यायेगु सहमति जूगु दु । अथेहे निगू दल दथुइ वर्तमान राजनीतिक गतिरोध ज्यंकेगु निंतिं तयार याःगु मंकाः संकल्प प्रस्तावया मस्यौदाय् नं सहमति नापसं थ्यंगु दु ।
आइतवाः माओवादी उपाध्यक्ष डा. बाबुराम भट्टराईया छेँय् निगू दल दथुइ जूगु सहलहलय् संविधान निर्माण, राष्ट्रपतिया पलाः, माओवादी दुथ्याःगु राष्ट्रिय सरकार लगायत विषयलय् खँल्हाबंला जूगु खः ।
सहलह लिपाः संचारकर्मीत नाप खँल्हाबंला यानादिसें एमाले नेता भरतमोहन अधिकारीं माओवादी गतिरोध ज्यंकेगु निंतिं दक्वं विषय प्याकेजय् समाधान जुइमाःगु प्रस्ताव तःगु कनादिल । वयेकलं आः मंकाः संकल्प प्रस्ताव सहमतिया नापसं थ्यंगु धयादिसें थुकी छुं छुं विषयलय् जक सहमति जुइ ल्यं दनीगु जानकारी बियादिल ।
वयेकलं संविधान निर्माणया निंतिं खनेदुगु जटिलता समाधान यायेत छगू कार्यदल निर्माण यायेगु सहमित जूगु व मेमेगु दलत नाप सहलह यानाः उगु कार्यदलय् मेमेगू दलयात नं दथ्याकीगु धयादिल ।
एमालें वर्तमान राजनीतिक गतिरोध ज्यंकेत नेपाली कांग्रेस नाप थौं हे वार्ता याइगु ज्याझ्वः दु ।
