वैकल्पिक लँपूपाखें बजेट पास यायेगु सरकारया बिचाः : संचारमन्त्री
सूचना व संचारमन्त्री शंकर पोखरेलं सरकार वैकल्पिक लँपू पाखें बजेट पास यायेगु मनस्थितिलय् थ्यंगु खँ धयादीगु दु ।
आइतवाः प्रेस चौतारी दाङं घोराहीलय् याःगु पत्रकार सम्मेलनय् न्ववानादिसें मन्त्री पोखरेलं माओवादीं संसद सुचारु जुइमब्यूसाः आः संसदय् बहुमत खाका वा अध्यादेश मार्फत बजेट पास यायेगु तयारीलय् सरकार लगे जुयाच्वंगु धयादिल ।
वयेकलं आः राज्य खर्चबिहीन जुया मन्ह्याइगु धयादिसें खर्चबिहीन जुइवं बैकल्पिक लँपू पाखे सरकार वनीगु दाबी यानादिल । वयेकलं आ तक तःधंगु दलयात छखे मतसें न्ह्यावनेगु कुतः सरकारं याःगु तर माओवादी सहमतिलय् वये चाहेमजूगुलिं उमित पियाच्वने मफइगु धयादिल ।
वयेकलं राष्ट्रपतियात पलाः ल्ह्वनेत माओवादी स्वयमं हे बाध्य याःगु धयादिसें उकी मेगू दलतय्सं सहलह याये जरुरी मजूगु धयादिल । माओवादीं याइगु आन्दोलनं सरकारयात छुं असर मलाइगु वयेकलं दाबी यानादिल । वयेकलं जनताया एजेण्डा ज्वना: जक जनआन्दोलन यायेफइगु खँ न्ह्यथंनादिसें छगू दलं जक याइगु आन्दोलनयात जनआन्दोलन धायेमफइगु बिचाः प्वंकादिल ।
