आन्दोलनं द्वन्द्व व मुठभेड ब्वलंकी : प्रम

प्रधानमन्त्री माधवकुमार नेपालं आन्दोलनया धम्कीपूर्ण भाषां सहमतिलय् अवरोध लाइगु धयादिसें थुकीं देशय् मुठभेड व द्वन्द्व ब्वलंकीगु धयादिल ।

शनिवाः येँय् सर्वेश्वर निमाविया न्हूगु भवन उल्लेज्या यानादिसें प्रधानमन्त्री नेपालं आन्दोलन यायेगु माओवादी निर्णयं सहमति यायेगु ज्या यात बिच्चे लाकूगु धयादिसें सहमतिया राजनीति पाखें पिहांमवनेत माओवादीयात इनाप यानादिल । माओवादीं सरकारयात कार्तिक १५ दुने थःपिनिगु माग पूवंकेत अल्टिमेटम ब्यूगु कन्हय् कुन्हु हे प्रधानमन्त्री नेपालं थंज्याःगु खँ धयादीगु खः ।

वयेकलं माओवादीयात आन्दोलन व धम्कीया भाषा मल्वःगु धयादिसें थुकीं सहमतिया लँपूयात अवरोध याइगु धयादिल । वयेकलं राष्ट्रपतिया जक दोष क्यनेगु स्वयां थः दुनेया दोष नं लुइकाः संसदया गतिरोध अन्त्य यायेमाःगु धयादिल ।