संघीय गणतन्त्रयात संस्थागत जुइमबीगु षड्यन्त्र : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' संघीय गणतन्त्रयात संस्थागत जुइमबीगु षड्यन्त्र जुयाच्वंगु द्वपं बियादीगु दु ।
नेपाल संवत् ११३० न्हूदँया लसताय् माओवादी भातृ संगठन नेवाः राष्ट्रिय मुक्ति मोर्चां शनिवाः याःगु मोटर साइलक र्यालीया उल्लेज्या यानादिसें वयेकलं जातीय मुक्ति जुइमबीपिं विरुद्ध खवरदारी यायेत इनाप यानादिल । वयेकलं माओवादीं बः बियावयाच्वंगु जातीय मुक्तिया नारायात पूर्ण जुइमबीत परम्परावादी व प्रतिगामी शक्तितय्सं अनेक षड्यन्त्र यानाच्वंगु धयादिल ।
शान्ति व न्हूगु संविधानया निंतिं नेवाः समुदायया भूमिकाया चर्चा यानादिसें वयेकलं नेपाल संवत्यात राष्ट्रिय संवत्या मान्यता प्रदान यायेत माओवादीं महत्वपूर्ण भूमिका म्हितुगु धयादिल । वयेकलं नेपाल संवत्यात अझ नं व्यवहारया ज्याखँय् छ्यलाबुला यायेमफुगु प्रति दुखः प्वंकादिल ।
नेपाल संवत् नेवाः समुदायया जक मजूगु धयादिसें माओवादी अध्यक्ष प्रचण्डं दक्वं अन्यया व उत्पीडनविरुद्धया प्रेरणा जूगु थुगु संवत् सकल नेपाःमितय् मंकाः संवत् खः धयादिल । वयेलं आः प्रचलनय् दुगु विक्रम संवत् नेपाली जनताया भावना नाप ज्वःमलाःगु नं धयादिल ।
बसन्तुलीं शुरु जूगु माटोरसाइकल र्याली नेवाः स्वायत्त राज्यया सीमा चाहिला आइतावः क्वचाइगु ज्याझ्वः दु ।
