एमाले दुने विवाद मिले यायेगु जिम्मा अध्यक्ष खनालयात

सत्ता नेतृत्व यानाच्वंगु नेकपा (एमाले)या स्थायी समितिं आन्तरीक विवाद मिले यायेगु जिम्मा पार्टी अध्यक्ष झलनाथ खनालयात ब्यूगु दु ।

पार्टी दुनेया विवाद ज्यंकेत शनिवाः पार्टीया मू ज्याकू बल्खुइ च्वंगु बैठकं उगु निर्णय याःगु खँ एमाले सचिव शंकर पोखरेलं कनादिल । वयेकलं पार्टी दुने अप्वयाच्वंगु विवादया कारणं पार्टी संचालन प्रति स्थायी समिति दुजःतय्सं असहमति प्वंकूगु व पार्टी दुनेया विवाद तत्काल ज्यंकेत माग याःगु खः ।

पार्टी दुने अध्यक्ष खनाल व वरिष्ठ नेता केपी शर्मा ओली दथुइ विवाद अप्वयेवं थीथी जिल्लाय् समानान्तर जिल्ला कमिटी गठन जूगु खः ।

विवाद अप्वयेवं बिहीवाः अध्यक्ष खनाल, प्रधानमन्त्री माधवकुमार नेपाल व नेता ओली दथुइ जूगु खँल्हाबंलाय् सहमति कथं न्ह्याः वनेगु समझदारी जूगु खः ।