कामु सेनापतिलया जिम्मेवारी सिंहयात
सरकारं नेपाली सेनाया वरिष्ट रथि तोरणजंग बहादुर सिंहयात कायम मुकायम प्रधानसेनापतिया जिम्मेवारी बीगू निर्णय याःगु दु ।
शुक्रवाः च्वंगु मन्त्रिपरिषदया बैठकं प्रधानसेनापति छत्रमानिसंह गुरुङ छगू सम्मेलनय् ब्वति कायेते अमेरिका वनेत्यंगुलिं रथि सिंहयात कामुया जिम्मेवारी बीगू निर्णय याःगु ख: । कामु सेनापतिया जिम्मेवारी ब्यूम्ह सिंह भैरवनाथ गण्य् बन्दीत बेपत्ता याःगु द्वपनय् मानवअधिकार उल्लंघन याम्ह घकाः मानव अधिकार संघ संस्थात पाखें आलोचित जुयाच्वनादिम्ह खः ।
अथेहे मन्त्रिपरिषदं रेडियो नेपालया कार्यकारी निर्देशकय् तपनाथ शुक्लायात नियुक्त याःगु दु । अथेहे समाज कल्याण परिषदया सदस्य सचिवय् सन्तोष पाण्डे व स्थानीय बिकास प्रशिक्षण केन्द्रय् गोविन्द प्रसाद गुरागाईयात नियुक्त याःगु दु ।
बैठकं संवैधानिक निकायया पदाधिकारीयात तलब कानुनया व्यवस्था जू कथं यायेत व राजनीतिक नियुक्ति यायेगु ईलय् व्यवस्थित यायेत समिति गठन यायेगु निर्णय नं याःगु दु । अथेहे बैठकं मध्य व सुदूरपश्चिमाञ्चलया जिल्लाय् बाढी पहिरो पिडीतया निंतिं राहत प्रदान यायेत प्रधानमन्त्रीया संयोजकत्वय् छगू समिति गठन याःगु दु ।
