माग पूवंकेत माओवादी पाखें अल्टिमेटम
प्रमुख प्रतिपक्षी दल एकीकृत नेकपा (माओवादीं) थःपिंसं न्ह्यने सारे याःगु माग पूवंकेत सरकारयात कात्तिक १५ तकया अल्टिमेटम ब्यूगु दु ।
शुक्रवाः च्वंगु माओवादीया स्थायी समितिया बैठकं राष्ट्रपतिया पलाःया बारे संसदय् सहलह यायेगु माग पूवंकेत सरकारयात कात्तिक १५ तकया अल्टिमेटम ब्यूगु खः । माओवदीं कात्तिक १५ गते दुने नं थःपिनिगु माग पूमवंसाः आन्दोलन यायेगु ख्याच्वः ब्यूगु दु ।
माओवादी प्रवक्ता दिनानाथ शर्मां राष्ट्रपतिया पलाया बारे संसदय् सहलहया निंतिं सहमति मालेत सरकारयात ई ब्यूगु धयादिल । वयेकलं दलत दथुइ सहमतिया सम्भावना म्हो जुया वनाच्वंगुलिं आन्दोलन पाखें हे बटम लाइन न्ह्यब्वयेत अज्याःगु निर्णय याःगु धयादिल ।
पार्टीया मूज्याकू पेरिसडाँडाय् च्वंगु बैठकय् दलत दथुइ आः जुयाच्वंगु सहलह पाखें राष्ट्रपतिया पलाः भिंकाः नागरिक सर्वोच्चता स्थापना यायेगु वातावरण निर्माण मयासाः सशक्त आन्दोलन घोषणा यायेगु निर्णय बैठकं याःगु दु ।
बैठकं सत्तारुढ दलत दुनेया अन्तविरोधं यानाः सहमति जुइगु स्थिति मदुगु ठहर याःगु दु । माओवादीं याःगु आन्दोनयात सरकरां सुनुवाई मयाःगुलिं मेगू सहमतिया निंतिं सशक्त आन्दोलन आवश्यक जूगु निष्कर्ष बैठकं पिकाःगु दु । आः कतया वार्ता, कार्यदलं तयार याःगु दस्तावेज, आन्दोलनया समीक्षा व रिपोटिङ लिपाः पार्टीं थःगु बटम लाइन न्ह्यने सारे याइगु जूगु दु ।
