इमानदार व चरित्रवान जू : प्रम
प्रधानमन्त्री माधवकुमार नेपालं विद्यार्थीतय्त इमानदार व चरित्रवान जुया उपाधिया मर्यादा बचे यानातयेत इनाप यानादीगु दु ।
शुक्रवाः काठमाडौं विश्वविद्यालयया झिंन्याक्वःगु दीक्षान्त समारोहयात सम्बोधन यानादिसें वयेकलं लगनशील शिक्षक, अनुशासित विद्यार्थी व कर्तव्यपरायण अभिभावक पाखें जक गुणस्तरीय शिक्षाया परिकल्पना यायेफइगु धयादिल । वयेकलं दीक्षित विद्यार्थीय्त प्रतिज्ञा याकादिसें देय् दुने हे अवसर मलेत व असहायया हितय् ज्या यायेत इनाप यानादिल ।
विश्वविद्यालय पाखें स्नातक, स्नातकोत्तर व विद्यावारिधि याःपिं १४८६ म्ह छात्रछात्रातय्त दीक्षान्त समारोहलय् अतिथि कोलम्बो विश्वविद्यालयया उपकुलपति प्रा. डा. एसएसएमके क्षनिका हिरिम्बुरेगामा व प्रधानमन्त्री नेपालं दसिपौ लःल्हानादीगु खः ।
कोलम्बो विश्वविद्यालयया उपकुलपति प्रा. डा. हिरिम्बुरेगामां इमानदार व प्रतिबद्ध मनूतय्त दक्वस्यां साथ बिइगु धयादिल । अथेहे काठमाडौं विश्वविद्यालयया उपकुलपति डा. सुरेशराज शर्मां न्हूगु शिक्षा निति फुपिंत पुइकीगु व मफुपिंत ग्वाहालि यायेगु कथं जुइमाःगु बिचाः प्वंकादिल ।
