'ईलय् हे संविधान निर्माण जुइगुलि आशंका'
संविधानसभाया उपाध्यक्ष पूर्णकुमारी सुवेदीं राजनीतिक दलत दथुइया खिचातानी व असहमतिया कारणं ईलय् हे संविधान निर्माण जुइगुलि आशंकाः ब्वलंगु खँ धयादीगु दु ।
शुक्रवाः बुटवलय् सामुदायीक रेडियो प्रशारण संघया खुक्वःगु साधारणसभाया उल्लेज्या यानादिसें वयेकलं व्यस्थापिका संसद अवरुद्ध जुसां संविधानसभा सुचारु हे जुयाच्वंगु खँ न्ह्यथंनादिसें संविधान निर्माण यायेगु ज्या स्वयां मेमेगू ज्याय् हे राजनीतिक दलतय् ध्यान केन्द्रीत जूगु द्वपं बियादिल ।
वयेकलं दलतय् थंज्याःगु पहया कारणं हे संविधानसभाया विषयगत समितिं नं तीव्र रुपं ज्या यायेमफुगु धयादिल । वयेकलं संविधानसभाया बैठकय् दलतय्सं गू गतिलय् ब्वति कायेमाःगु खः अथे मकाःगुलिं संविधानसभाया विषयगत बैठकत बिस्तारं न्ह्याः वनाच्वंगु धयादिल । संविधानसभां कार्यतालिका कथं ज्या याये मफयाच्वंगुलिं आम जनताय् ईलय् हे संविधान निर्माण जुइगुलिं आशंका ब्वलंगु खँ नं वयेकलं धयादिल ।
वयेकलं दलत दथुइ सहमति व सहकार्य मजुयाः राजनीतिक अवस्था जटिल जूगु धयादिसें ईलय् हे संविधान निर्माण यायेत दलत दथुइ सहमति व सहकार्यया विकल्प मदु धयादिल । वयेकलं थुकीया निंतिं दक्वं दलतय्त मिलेजुया संविधान निर्माण यायेगु ज्या पाखे केन्द्रीत जुइत नं इनाप यानादिल ।
