थौं नेवाः सभासद्तय् प्रतिवद्धता

येँ (सन्ध्या टाइम्स)/संघीय लोकतान्त्रिक गणतन्त्र नेपाः व नेवाः स्वायत्त राज्य स्थापनाया पक्षय् थौं २२ म्ह नेवाः सभासद्तय्सं मंकाः प्रतिवद्धता प्वंकीगु जूगु दु। नेवाः स्वायत्त राज्य मंकाः संघर्ष समितिया ग्वसालय् थौं राष्ट्रिय सभागृहय् छगू ज्याझ्वः यासें थ्व प्रतिवद्धता प्वंकेत्यंगु खः।
संविधानसभाय् दुपिं ३१ म्ह नेवाः सभासद्त मध्ये थौं २२ म्हेस्यां थ्व प्रतिवद्धता प्वंकेत्यंगु खः। छुं ई न्ह्यः उगु प्रतिवद्धताया अवधारणा सार्वजनिक याःबलय् उकी १७ म्ह जक नेवाः सभासद्तय्सं सहमति क्यंगु खः। नेमकिपाया सकलें सभासद नापं नेकांया प्रकाशमान सिंह, गोपालमान श्रेष्ठ, ध्यानगोविन्द रंजित आदिपिंसं उकी सही याःगु मदुनि।
थ्वहे झ्वलय् थ्व प्रतिवद्धता प्वंकूपिं नेवाः सभासद्तय्त थ्वहे वइगु २४ गते किपुली नेवाः स्वायत्त राज्य मंकाः परिषद्पाखें जात्रा यानाः हनेत्यंगु खँ सीदुगु दु ।