समावेशी न्हूगु कार्यदल नीस्वनीगु
येँ (सन्ध्या टाइम्स)/नेपाल संवत् ११३० न्हूदँ क्यंगु लसताय् कछलाथ्व पारु कुन्हु मध्यपुर थिमि स्थित शंखधर चोकय् नेपाल संवत्या प्रवर्तक राष्ट्रिय विभूति शंखधर साख्वाःया झ्वाताय् स्वां देछायेगु ज्या जुल ।
राष्ट्रिय विभूति शंखधर साख्वाः प्रतिष्ठानया ग्वसालय् जूगु उगु ज्याझ्वलय् मूपाहां प्रधानमन्त्री माधवकुमार नेपालं शंखधर साख्वाःया विषय तथ्य खँ पित हयेगु निंतिं छगू न्हूगु हे पहलं कार्यदल नीस्वनेगु खँ कनादीगु दु। प्रधानमन्त्रीया कथं आः नीस्वनीगु न्हूगु कार्यदल समावेशी ढंगं सकलें सहभागी जुइ ।
प्रतिष्ठानया नायः मदनकृष्ण श्रेष्ठया सभापतित्वय् जूगु उगु ज्याझ्वलय् नेवाः देय् दबूया संरक्षक मल्ल के. सुन्दरं आः तक गुगुं नं दलया नेतृत्वय् वःगु सरकारं शंखधरया बारे विस्तृत अध्ययन यायेत कमिटी नीस्वंसां ज्या मजूगु खँय् असन्तुष्टि प्वंकादिल ।
उगु ज्याझ्वलय् पाहां कथं झायादीपिं उर्जा मन्त्री प्रकाशशरण महत, नेपाली कांग्रेसया उप-सभापति रामचन्द्र पौडेल, रा.प्र.पा.या नायः पशुपति शम्शेर जबरा, नेपाल आदिवासी जनजाति महासंघया नायः पासाङ्ग शेर्पापिंसं नं शंखधर व नेपाल संवत्यात व्यहारिकताया विषय कयाः न्ववानादीगु खः ।
प्रतिष्ठानया न्वकु राजेन्द्रमान श्रेष्ठं लसकुस यानादीगु उगु ज्याझ्वलय् पाहां कथं नेवाः देय् दबूया नायः नरेश ताम्राकार व पुलांम्ह सांसद लेखनाथ न्यौपाने झाःगु खः ।
उगु ज्याझ्वलय् प्रतिष्ठानया म्हसीका बीगु झ्वलय् प्रतिष्ठानया सचिव नापं ज्याझ्वःया कजि श्यामकृष्ण मानन्धरं नेपाल संवत्यात व्यवहारय् लागू यायेत सरकारी स्तरं पहल यायेत, शंखधर साख्वाःयात राष्ट्रिय विभूति घोषणा यायेधुंकूगु अवस्थाय् उकुन्हुया न्हियात सार्वजनिक विदाया घोषणा लिसें माल्यार्पण जुइगु दिं कुन्हु राष्ट्रिय पर्वया रुपय् मान्यता बीत सरकारयात माग याःगु खः ।
थ्वहे झ्वलय् राष्ट्रिय विभूति शंखधर साख्वाःया विषयय् स्कूलया दक्वं तगिमय् ब्वने दइ कथंया व्यवस्था यायेगु निंतिं पाठ्यक्रम विकास केन्द्रं याकनं हे पहल न्ह्याकेत्यंगु खँ सीदुगु दु ।
