थुगुसीया न्हूदँ
थुगुसी न्हूदँया लसताय् जूगु थीथी ज्याझ्वःया छपुलु
- थुगुसी न्हूदँया लसताय् प्रधानमन्त्री माधव नेपालं थिमिया शंखधर चोकय् च्वंगु शंखधर साख्वाःया झ्वाताय् स्वां देछासें थःगु न्हूदँ आरम्भ यानादिल। उगु हे ज्याझ्वलय् वय्कलं नेपाल संवत्यात व्यवहारय् छ्यले जी कथं दयेकातःगु न्हूगु क्यालेण्डरया उलेज्या नं यानादिल ।
- वयां लिपा नेपालभाषा मंकाः खलः न्हूदँ समारोह समिति-११३० पाखें बसन्तपुली याःगु मूल समारोहय् झायाः वय्कलं संवोधन यानादीगु खः। अन न्ववासें वय्कलं नेपाल संवत्यात राष्ट्रिय मान्यता बीधुंकाः आः उकियात व्यवहारय् छ्यलेगु लागिं माःगु पहल यायेगु बचं बियादिल ।
- न्हूदँ कुन्हु हे न्हिनय् प्रधानमन्त्री वालुवाटारय् प्रधानमन्त्री माधव नेपालं छगू तुच्चा ज्याझ्वः यानादीगु खः। ज्याझ्वलय् भाषा आन्दोलनया न्ह्यलुवा, कार्यकर्ता नापं राजनीतिक पार्टीया नेतात नं सहभागी जुयादीगु खः।
- बसन्तपुली थुगुसी पिहां वःगु र्यालीइ नेपलिज फेशन होमं मिस नेवाः, मिस लिटिल नेवाः व उकिया मेपिं विजयी सहभागीत दुथ्याकाः न्हूगु कथं ब्वति कया वःगु खः।
- थुगुसी न्हूदँया लसताय् सफू सिबें नं सीडी व भीसीडी अप्वः पिहां वःगु खने दत। बसन्तपुली फुक्क हे सीडी/भीसीडी तय्सं उलि हे बजाः काल।
- न्हूदँया हे लसताय् लाकाः एनेकपा (माओवादीं) येँया भृकुटीमण्डपय् छगू तःधंगु तुच्चा ज्याझ्वः यात। ज्याझ्वलय् प्रधानमन्त्री माधव नेपाल मथ्यं, उपप्रधानमन्त्री सुजाता कोइराला धाःसा थ्यन। एमालेया अध्यक्ष झलनाथ खनाल थ्यन तर नेकां सभापति गिरिजाप्रसाद कोइराला धाःसा मथ्यं। ज्याझ्वलय् सहभागी गैरनेवाः नेतातय्सं नं छम्हं मेम्हेसित 'भिंतुना' धाधां अभिवादन याःगु खः।
