वीरगञ्जय् शंखधरया झ्वाता तइगु
वीरगंज (सन्ध्या टाइम्स)/ वीरगञ्जय् वंगु कौलागा आमै कुन्हु जूगु भिंतुना सांस्कृतिक र्यालीया झ्वलय् नेपाल संवत्या प्रणेता शंखधर साख्वाःया झ्वाता तयेगु थाय्या शिलान्यास याःगु दु ।
वीरगञ्ज नेवाः खलः व नेपालभाषा खलः वीरगञ्जया ग्वसालय् जूगु ज्याझ्वलय् अनया मेनरोड धइगु थासय् झ्वाता तयेगु कथं शिलान्यास जूगु खँ नेवाः खलःया नायः असोककुमार श्रेष्ठं जानकारी बियादीगु दु। अन थ्वहे कार्तिक महिनाया दुने झ्वाता तयेगु कथं ज्या जुयाच्वंगु खँ नं वय्कलं कनादीगु दु। उकिया निंतिं झ्वाताया अर्डर नं जुइधुंकूगु जानकारी नं वय्कलं बियादिल ।
नेवाः खलः वीरगञ्ज व नेपालभाषा वीरगञ्जया मंकाः ग्वसालय् जूगु उगु ज्याझ्वलय् थीथी गैर नेवाः जाति नं थःपिनि ब्यानर सहित ब्वति काःगु खःसा अथे हे वीरगञ्जं संविधानसभाय् प्रतिनिधित्व यानाच्वंपिं सभासद्पिंसं नं ब्वति काःगु खः ।
लिसें सांस्कृतिक र्याली उद्योगपति व्यापारी आदिपिंसं नं ब्वति काःगु खः ।
