पाल्पाय् न्हूदँ तजिक हन
पाल्पा (सध्या टाइम्स)/ पासा खलः पाल्पाया ग्वसालय् नेसं ११३० न्हूदँ थीथी ज्याझ्वः यासें तःजिक हन। पाल्पाया टुडिख्यलय् च्वंगु वीरेन्द्र पार्कं न्ह्याःगु सांस्कृतिक र्याली तानसेनया भिमसेन त्वाः, नारायण त्वाः, असन, मखन, शितलपाटी, भगवति त्वाः, टक्सार, सिल्खान, बडिज्ञा त्वाः चाःहिलाः वीरेन्द्र पार्कय् क्वचाःगु खः। धिमे सहित चाःहिउगु उगु सांस्कृतिक र्यालीइ आपालं नेवाःतय्सं नेवाःतय् मौलिक वसः पुनाः र्यालीइ ब्वति काःगु खः ।
थुगुसी पासा खलः पाल्पां येँनिसें धिमे गुरु शेषनारायण महर्जनयात आमन्त्रण यानाः लछियंक धिमे बाजं थायेगु तालिम ग्वसाः ग्वःगु खः। प्रशिक्षार्थीपिंसं हे उगु सांस्कृतिक र्यालीइ धिमे बाजं थानाः ब्वति काःगु थ्व दकलय् न्हापांगु खः ।
अथे हे तानसेनया इलेभेन ब्रदर्शया ग्वसालय् भिन्तुना मोटरसाइकल र्याली नं जूगु दु। उगु र्याली न्ह्याये न्ह्यः पासा खलः पाल्पाया नायः छत्रराज शाक्यं नेपाल संवतया महत्व कनादीगु खः ।
पाल्पा पासा खलःया हे ग्वसालय् अन शंखधरया सालिक दयेकेगु ज्या नं न्ह्यानाच्वंगु दु। सालिक दयेकेगु निंतिं थीथी व्यक्ति व संस्थां माःगु ग्वाहालि यानाच्वंगु दुसा थप ग्वाहालिया निंतिं खलकं इनाप याःगु दु ।
