न्याम्ह च्वमिया न्यागू सफू विमोचन
ख्वप (सन्ध्या टाइम्स)/न्हूदँया लसताय् ख्वपया न्याम्ह च्वमिपिनि न्यागू बाखं सफू म्हिगः न्याम्ह हे साहित्यकारपिंसं विमोचन यानादिल। शौरभ शाक्यया 'क्वःगु झ्वाता', श्याम आशाया 'पंजलं दुने/पंजलं पिने', विमल ताम्राकारया 'न्हूगु निभाः न्हूगु नेपाः', कृष्णभक्त बोडेया 'कःघाये मफुगु ई' व काशीराम विरसया 'आस्थाया किपा' साहित्यकारपिं राम शेखर नःकमि, लक्ष्मण राजवंशी, नर्मदेश्वर प्रधान, राजा शाक्य व मथुरा साय्मिं विमोचन यानादिल ।
ज्याझ्वलय् विमोचन जूगु सफूयात कयाः समालोचक इन्द्र मालीं नेपालभाषाया बाखं क्षेत्रया लँपु ज्यायेत विमोचित बाखं सफू सफल जूगु खँ कनादिल ।
मूहापां नेपालभाषा केन्द्रीय विभागया प्रमुख प्रा. प्रेमशान्ति तुलाधरं न्हूदँयात विमोचन जूगु सफू देछागुलिं गौरव जूगु दु धयादिल ।
याताजःया ग्वसालय् भाषाविद् रत्नगोपाल सैंजुया सभापतित्वय् उगु ज्याझ्वः जूगु खः ।
