सेनापति प्रकरण भारतपाखें प्रभावित : प्रा. वेइ
येँ (सन्ध्या टाइम्स)/वर्तमान राजनीतिया दकलय् विवादास्पद विषय जुयाच्वंगु प्रधानसेनापति प्रकरण वास्तवय् भारतपाखें प्रभावित घटना खः धकाः छम्ह चिनियाँ विज्ञं द्वपं बियादीगु द। नेपाः व भारतविद् धकाः नांजाःम्ह चिनियाँ विद्वान प्रा. वाङ हाङ वेइं म्हिगः बीबीसीलिसे खँ ल्हासें थ्व द्वपं बियादीगु खः ।
तत्कालिन प्रधानसेनापति रुक्मांगत कटवालयात चीकेगु खँय् शुरुइ एमाले नेतात तयार हे जुइधुंकूगु खःसां लिपा भारतया मन्त्री प्रणव मुखर्जीं एमाले अध्यक्ष झलनाथ खनालयात फोन याना हयेवं थ्व प्रकरण शुरु जूगु खँ नं वय्कलं कनादिल ।
नेपाःया स्थिरता हे चीनया मू चाहना खः तर उकिया लागिं नेपालय् हस्तक्षेप यायेगु ज्या चीनं याइ मखु धासें बरु अज्याःगु ज्या यायेत भारतीय नेतात न्ह्याबलें इच्छुक जुयाच्वनीगु द्वपं नं बियादिल। वय्कलं धयादिल, 'अज्याःगु ज्या चीनं गबलें याइ मखु। बरु चीनं छुं यात कि भारतं उकी शंका याना हे बी ।'
भारतं न्ह्याबलें नं नेपालय् आधिपत्य जमे यायेत कुतः यानाच्वनी धासें गुलिखे भारतीय नेतातय्सं खुल्ला रुपं हे नेपाःयात निगूगु भूटान दयेका बी धकाः धायेगु यानाच्वंगु खँ नं वय्कलं कनादिल ।
माओवादी अध्यक्ष पुष्पकमल दाहाल 'प्रचण्डं' नकतिनि यानादीगु चीन भ्रमणयात कयाः उगु अन्तर्वार्ता जूगु खः। चीनय् माओवादी अध्यक्ष प्रचण्ड व चिनियाँ राष्ट्रपति हु जिन्ताओया दथुइ नेपाःयात गय् यानाः स्थिर यायेगु धइगु विषयय् हे खँल्हाबल्हा जूगु जुइमाः धकाः वय्कलं अनुमान यानादिल। प्रा. वेइया कथं उगु खँल्हाबल्हाय् यदि नेपाःपाखें थःगु देशय् विदेशी हस्तक्षेप जुइफइगु बारे छुं खँ पिकाल धाःसा उकी चीनं नं रुची तयेफु तर उगु हस्तक्षेप धइगु थौंकन्हय् भारतीय नेतातय्सं नेपालय् यानाच्वंगु थेंज्याःगु हस्तक्षेप धाःसा मखु ।
चीनं नेपाःया सकलें राष्ट्रवादी शक्तितय्त समर्थन याइ धासें वय्कलं माओवादी नेपाःया दकलय् शक्तिशाली व वैध राष्ट्रवादी शक्ति जूगु कारणं वयालिसे चीनया स्वापू बांलाइगु स्वाभाविक जुइगु खँ नं कनादिल।
