'प्रधानमन्त्रीया कार्यशैलीप्रति कांग्रेस नेतात असन्तुष्ट'
नेपाली कांग्रेस संसदीय दलया नेता रामचन्द्र पौडेलं प्रधानमन्त्री माधवकुमार नेपालया कार्यशैली प्रति कांग्रेस नेतात असन्तुष्ट जूगु खँ धयादीगु दु ।
बिहीवाः न्हिनय् चितवनया भरतपुर विमानस्थलय् संचारकर्मीत नाप खँल्हाबंला यानादिसें वर्तमान सरकारय् सत्ता साझेदार दलत दथुइ मतभेद मजुसां प्रधानमन्त्रीया कार्यशैली प्रति असन्तुष्टी प्वंकादिल । वयेकलं थ्वहे असन्तुष्टी पाखें सरकार परिवर्तनया सम्भावना मदुगु स्पष्ट यानादिल ।
वयेकलं माओवादीं संसदय् यानाच्वंगु अवरोध प्रति आक्रोश प्वंकादिसें संसद अवरोध यायेगु नं छगू सीमा दइगु धयादिल । वयेकलं प्रतिपक्षं विरोधया स्वरुप संसद अवरुद्ध याये दइगु तर व सांकेतिक जुइमाः धयादिल ।
कांग्रेस निकट प्रजातान्त्रि सेनानी संघया सभापति चिज कुमार श्रेष्ठ मदुगु झिंस्वन्हुया पुण्य तिथिलय् ब्वति कायेत चितवन झायादिम्ह पौडेलं माओवादीया कारणं हे वर्तमान समस्या ज्यंकेमफुगु द्वपं बियादिल । वयेकलं माओवादीं राष्ट्रपतिया पलाः भिंकेमाः धकाः तयाच्वंगु मागय् कांग्रेस सहमत जुइमफइगु धयादिल ।
