शान्ति सम्झौता संशोधन यायेगु खँय् अनमिनया च्यूताः

प्रधानसेनापति गुरुङं नं प्रधानमन्त्री नापलात

नेपाः स्थित राष्ट्रसंघिय मिसन (अनमिनं) न्हूगु सैनिक भर्ती यायेगु ज्या शान्ति सम्झौता विपरित जुइगु खँय् सरकारयात हानं ध्यानाकर्षण याःगु दु ।

अनमिन प्रमुख करिन ल्यानग्रेनं बिहीवाः प्रधानमन्त्रीया ज्याकू सिंहदरवारय् प्रधानमन्त्री माधवकुमार नेपालयात नापलानाः वृहत शान्ति सम्झौता हिलेगु सम्बन्धय् रक्षा मन्त्रीया धापू बारे च्यूताः प्वंकादीगु खः ।

नेपाली सेनाय् खाली जूगु थासय् सैनिक भर्ती यायेत सरकार नाप रक्षा मन्त्रालयं अनुमति फ्वंगु ईलय् अनमिनं सरकारया ध्यानाकर्षण याकूगु दु। थ्वस्वयां न्ह्यः माओवादी सरकारया ईलय् नं सेनां खाली जूगु थासय् सैनिक भर्ती यायेत्यंगु ईलय् अनमिनं विरोध प्वंकूगु खः ।

रक्षामन्त्री विद्या भण्डारीं नेपाली सेनाया हितया निंतिं सरकार व माओवादी दथुइ २०६३ मंसिरय् जूगु वृहत शान्ति सम्झौताया छुं बुँदात हिलेमाःगु बिचाः प्वंकूगुलिं अनमिन प्रमुखं उकीया बारे प्रधानमन्त्री नाप च्यूताः प्वंकादीगु खः ।

खँल्हाबंलाया झ्वलय् प्रधानमन्त्री नेपालं थुकीया विषयलय् प्रमुख दलत नाप सहलह यानाः सहमतिलय् जक सरकार न्ह्याः वनेगु प्रतित्रिया बियादिल ।

अथेहे खँल्हाबंलाय् अयोग्य ठहर याःपिं माओवादी लडाकूया अवस्था व सेना समायोजनया विषयलय् नं सहलह याःगु खः । नापं शान्ति प्रकृया, संविधान निर्माण लगायत विषयलय् नं सहलह जूगु खः ।

अथेहे प्रधानसेनापति छत्रमान गुरुङं नं प्रधानमन्त्री माधवकुमार नेपालयात नापलनाः थःगु अमेरिका भ्रमणया बारे जानकारी बियादीगु दु ।

झिंनिक्वःगु अन्तरराष्ट्रिय सेना प्रमुखतय् सम्मेलनय् ब्वति कायेत प्रधानसेनापति गुरुङ थ्वहे वइगु शनिवाः अमेरिका वनेत्यंगु दु । वयेकया अनुपस्थितिलय् सेनाया वरिष्ठ उपरथी तोरणजंगबहादुर सिंह कायम मुकायम सेनापतिया जिम्मेवारी काइगु जूगु दु ।

उपरथी सिंह तत्कालिन नेकपा (माओवादी) नापया सशस्त्र विद्रोहया ईलय् भैरवनाथ गणं पीस्वम्ह बनदीत बेपत्ता याःगु ज्याया नेतृत्व याःगु द्वपं लगे जुयाच्वंम्ह खः ।