सरकार सशस्त्र पुचःयात निशस्त्र यायेगु ज्याय्
गृहमन्त्री भीम रावलं देया थीथी थासय् दुगु सशस्त्र पुचःयात निशस्त्र यानाः शान्तिपूर्ण समाजया निर्माण यायेगु ज्याय् सरकार लगेजुयाच्वंगु खँ धयादीगु दु ।
न्यय्प्यक्वःगु प्रहरी दिवसया लसताय् बिहीवाः प्रहरी प्रधान ज्याकू नक्सालय् याःगु श्रद्धान्जली ज्याझ्वलय् वयेकलं सशस्त्र पुचःया हे अपराधिक ज्याखँत नियन्त्रण यानाः देशय् सुखशान्ति व अमनचयन कायम यायेत सरकारं विशेष योजना हःगु स्पष्ट यानादिल ।
वयेकलं देशय् दिगो शान्ति स्थापनाया निंतिं जीवन बलिदान याःपिं अमर प्रहरीया चाहनायात आत्मसाथ यासें हानं हिंसा व द्वन्द्वया चपेटाय् देय् मलायेमाः धकाः नं राष्ट्रिय सुरक्षा योजना लागू यानाःगु धयादिल ।
सुरक्षा योजना छुं नं वर्ग व क्षेत्र प्रति लक्षित मजूगु स्पष्ट यानादिसें वयेकलं न्हूगु संविधान निर्माण यानाः शान्ति प्रकृयायात निष्कर्षय् थ्यंकेगु लक्ष्य सरकारया जूगु धयादिल ।
