चीन व भारत नाप बांलागु स्वापू दयेकाः तयेमाः : प्रम
प्रधानमन्त्री माधवकुमार नेपालं राष्ट्रिय हितया निंतिं चीन व भारत नाप बांलागु स्वापू दयेकाः तयेमाःगु बिचाः प्वंकादिल । वयेकलं निगू मित्रराष्ट्रया दथुइ नेपाः दुगुलिं विशिष्ठ भू-राजनीतिक अवस्थाया कारणं राष्ट्रिय हितया महत्व अप्वयाचवंगु धयादिल । वयेकलं नेपालय् न्ह्याःगु दलं सरकारया नेतृत्व यासां चीन व भारत दथुइया स्वापूयात आपसी हितया आधारय् उच्च प्राथमिकता ब्यूगु धयादिल ।
बुधवाः सेन्टर फर साउथ एसिया स्टडिज व कोर्नाड फाउन्डेसनं ग्वसाःग्वःगु 'नेपाःया राष्ट्रिय हित : नीति व सुझाव' विषयक गोष्ठीया उल्लेज्या यानादिसें प्रधानमन्त्री नेपालं दक्वं राजनीतिक दलत दथुइ सहमति व सहकार्य जुइफुसा जक धिसिलाःगु शान्ति स्थापना यानाः देय्यात न्ह्याकेफइगु बिचाः प्वंकादिल ।
वयेकलं शान्ति प्रकृयायात निष्कर्षय् थ्यंकेगु, ईलय् हे संविधान निर्माण यायेगु व माओवादी लडाकूया समायोजन यायेगु प्रमुख स्वंगू ज्या सरकारया न्ह्यने दुगु व स्वंगूलिं ज्या यायेत वर्तमान सराकार सक्षम जूगु दाबी यानादिल ।
गोष्ठीइ नेकपा (एमाले)या उपाध्यक्ष वामदेव गौतमं राजनीतिक दलत दथुइ सहमति व सहकार्य जुइमफुसा निर्धारित ईलय् संविधान निर्माण जुइमफइगु धयादिसें माओवादीयात ब्यागलं तया न्हूगु संविधान निर्माण जुइमफइगु दाबी यानादिल ।
