'सहमतिया सम्भावना म्हो जक'

एकीकृत नेकपा (माओवादी)या वरिष्ठ उपाध्यक्ष मोहन वैद्य 'किरणं' दलतयसं सहमतिया निंतिं न्ह्याक्वः हे माकूगु खँल्हासां राष्ट्रपतिया असंवैधानिक पलाःया बारे सम्बोधन मजुतले सहमति जुइमफइगु खँ धयादीगु दु ।

जनसंचार अभियानं बुधवाः येँ याःगु छगू ज्याझ्वलय् न्ववानादिसें वयेकलं राजनीतिक निकास मालेगु खःसा राष्ट्रपतिया पलाखय् गन कमिकमजोरी जूगु खः मालाः उकीयात भिंकेगु विषयलय् दलतय्सं बिचाः यायेमाः धयादिल । वयेकलं थुकीयात सम्बोधन यायेत दलत इच्छु खनेमदुगुलिं सहमतिया सम्भावना नं म्हो जक जूगु धयादिल ।

वयेकलं समग्र परिस्थितिया मूल्यांकन यायेत याकनं हे स्थायी समितिया बैठक च्वनीगु व उगु बैठकं सशक्त संघर्षया ज्याझ्वः क्वछीइगु कनादिल । वयेकलं अज्याःगु आन्दोलनयात सशक्त व प्रभाकारी दयेकाः माओवादी जनआन्दोलन न्ह्याकीगु दाबी यानादिल ।