कांग्रेस महासमिति बैठकया तयारीलय्
कात्तिक १५ निसें १७ तक येँय् जुइगु महासमिति बैठकया तयारी बारे सहलह यायेत नेपाली कांग्रेसया केन्द्रीय पदाधिकारी व महासमिति व्यवस्थापन समितिया बैठक बुधवाः च्वंगु दु ।
पार्टीया केन्द्रीय ज्याकू सानेपालय् च्वंगु बैठकय् महासमिति बैठकया व्यवस्थापकीय तयारीया बारे सहलह जूगु खः । अथेहे बैठकय् कांग्रेस पदाधिकारीया नापं महासमिति बैठक व्यवस्थापन समिति, स्वनिगःया कांग्रेस नेतात व सभासदतय्सं नं ब्वति काःगु खः ।
कांग्रेस केन्द्रीय समितिया बैठकं येँ जिल्ला कार्यसमितिया सभापति ध्यानगोबिन्द रन्जितया अध्यक्षताय् येँ, यल, ख्वपया कार्यसमिति, महानगर, उपमहानगर व नगर समितिया सभापतित दुथ्याःगु महासमिति बैठक व्यवस्थापन समिति गठन याःगु दु ।
बैठकय् झिंनिक्वःगु महाधिवेशनय् न्ह्यब्वइगु संशोधित विधान, राजनीतिक दस्तावेज लगायत विषयया बारे नं सहलह याइगु ज्याझ्वः दु ।
