इस्वी संवत्यात मान्यता बीगु खँ

सरकारं नेपाल संवत्यात राष्ट्रिय मान्यता बीधुंकाः आः विक्रम संवत्यात चीकेगु नामय् इस्वी संवत्यात मान्यता बीगु तयारी यानाच्वंगु समाचार पिहां वःगु दु । इस्वी संवत्यात व्यवहारिक मान्यता बीगु थ्व प्रकि्रया मन्त्रिपरिषद् तक थ्यनेधुंकूगु खँ दु । नेपाल संवत्यात राष्ट्रिय मान्यता बिउगुया नापनापं हे इस्वी संवत्यात व्यवहारय् छ्यलेगु धकाः याना हःगु थ्व तयारी खनाः सकलें अजूचायाच्वंगु दु ।

विक्रम संवत् नेपाःया मौलिक संवत् मखुगु कारणं यानाः थुकियात चीकेमाः धइगु माग राष्ट्रवादी जनतां न्हापांनिसें हे याना वयाच्वंगु खः । उकिया थासय् नेपाःया थःगु हे मौलिक संवत् नेपाल संवत्यात छ्यलेमाः धइगु उमिगु माग खः । तर सरकारं आः वयाः नेपाल संवत्यात राष्ट्रिय संवत्या मान्यता ला बिल तर व्यवहारय् धाःसा इस्वी संवत्यात छ्यलेगु कुतः यानाच्वंगु दु । थ्व स्वयम्य् हे विरोधाभाषपूर्ण ज्या खः । थ्व छगू राष्ट्रिय वहसय् यंकाः निर्णय यायेमाःगु विषय खः । नेपाल संवत्या आन्दोलन याःगु इस्वी संवत् व्यवहारय् छ्यलेमाः धकाः मखु । विक्रम संवत् नेपाली मखुसा इस्वी नं विदेशी खः । उकियात थौंकन्हय् गज्याःगु मान्यता बियातःगु खः वहे पाय्छि जुइ । उकियात कयाः हानं मेगु निर्णय यानाच्वनेम्वाः । सरकार यदि धाथें राष्ट्रवादी खः व साहस याइम्ह खःसा थ्वं तप्यंक हे नेपाल संवत्यात व्यवहारय् छ्यलेगु धकाः निर्णय यायेमाः । इस्वी संवत् बारे निर्णय याये न्ह्यः सरकारपाखें जनस्तरया प्रशस्त राय कायेमाः ।

More Stories Like this