स्वन्ति लिपा गतिरोध चिलीगु नेतातय् धापू
येँ (सन्ध्या टाइम्स)/स्वन्ति क्वचायेवं राजनीतिक गतिरोध चिला वनीगु खँ प्रधानमन्त्री माधव नेपालं धयादीगु दु। म्हिगः देउसी भैलो म्हितः वःपिं पत्रकार व नागरिक समाजया प्रतिनिधिलिसे खँ ल्हायेगु झ्वलय् वय्कलं उगु खँ धयादीगु खः ।
देशयात ताः ई तक संकटग्रस्त अवस्थाय् तयातये मजिउगु खँ धासें वय्कलं जनताया चाहना पूवंकेत सरकार प्रतिवद्ध दुगु खँ नं कनादिल ।
माओवादी लिसे न्ह्यानाच्वंगु वार्ता सकारात्मक जूगु खँ धासें वय्कलं स्वन्ति क्वचायेवं राजनीतिक सहमति कायम जुइगु बिचाः प्वंकादीगु खः ।
उखे एमालेया अध्यक्ष झलनाथ खनालं राजनीतिक गतिरोध चीकेगु निंतिं एमालें न्ह्यागु नं कथंया त्याग यायेत तयार दुगु खँ धयादीगु दु ।
अथे हे माओवादी उपाध्यक्ष डा. बाबुराम भट्टराईनं आःया राजनीतिक गतिरोधं संविधान च्वयेगु ज्याय् लिच्वः मलाइगु खँ कनादीगु दु। थःपिं राजनीतिक सहमतिया निंतिं लचक जुयाच्वनागु खँ नं वय्कलं कनादिल ।
