अतिकं गडबड जूवंगु थुगुसीया स्वन्ति

येँ (सन्ध्या टाइम्स)/थुगुसीया स्वन्ति नखः भद्रगोल जुयाः क्वचायेत्यंगु दु। तिथिया गडबडीं यानाः थुगुसी लक्ष्मीपुजा न्यायेकेगु ज्या हे निन्हु जू वन। खास यानाः यल व ख्वपय् म्हीग हे लक्ष्मीपुजा न्यायेकूपिं आपालं खनेदतसा येँय् धाःसा अधिकांश मनूतय्सं म्हिगः तिनि लक्ष्मीपुजा यात। येँय् नं मू शहर स्वयां पिनेया लागाय् म्हीग हे लक्ष्मीपुजा न्यायेकूपिं खने दत ।

तर म्हीग लक्ष्मीपुजा न्यायेकूपिं मनूतय्सं सुथय् खिचापुजा यानाः बहनी सापुजा यायेमाःगुलिं धाःसा म्हाइपु तायेकल।
नेपाल संवत्या आन्दोलनकारी नापं येँया स्वयम्भु व जनबाहाःया तिथि कथं नखः हनीपिं अप्वःसिनं धाःसा म्हिगः तिनि लक्ष्मीपुजा यात। उमिसं थौं म्हपुजा यानाः किजापुजा कन्हय् जक याइगु जूगु दु ।

थौं हे किजापुजा याये धकाः सुरे जुयाच्वंपिं आपालं मनूतय्सं ३ गते नं बिदा बिउगु कारणं कन्हय् जक किजापुजा याइगु जूगु दु। ३ गते बिउगु बिदां यक्वसित राहत प्रदान याःगु खने दत।

थुगुसी स्वन्ति नखः गडबड जू थें आः आकिवं नं अथे जुयाच्वंगु दु। आकिवंया क्यालेण्डरय् स्वांयाः पुन्हि हे तुत् जुयाच्वंगु कारणं थ्व नं विवादय् लायेफुगु खँ सम्बद्ध ज्योतिषतय्सं धाःगु दु ।

हँय् ख्यें छगःया ५० तका !

येँ (सन्ध्या टाइम्स)/तिथि जक मखु थुगुसी बजाःभावं यानाः नं स्वन्ति नखः प्रभावित जूगु खने दत। नखः हनेत मदयेक मगाःगु हलंज्वलंया भावं सर्गः थीवं मनूत थारान्हूगु खने दत। थुगुसी सकसितं अजूचायेक हँय्ख्येंया भाः थहां वन। म्हीग तक छगःया ४० तका थ्यंगु हँय्ख्यें म्हिगः बहनी वयाः हानं ५० तका थ्यन। न्हिनय् छुं छुं पसलय् ३५ तकां तक बीधुंकूगु खःसां बहनी अभाव जुइवं ५० तका थ्यंगु खः। खुद्रा व्यापारीतय्सं धाः कथं उमिसं हे छगःया २५ तकां पुलाः थोकं कया हःगु खः। हँय् ख्यें छगःया ५० तका थ्यंगु थ्वहे न्हापांखुसी खः। भारतं वयेमाःगु हँय्ख्यें फुक्क बर्डफ्लुया कारण क्यनाः नेपाः दुकायेके मबीवं थथे भाः थहां वंगु खँ व्यापारीतय्सं धाःगु दु ।

थ्वहे झ्वलय् हँय् ख्येंया भाः थहां वंगुलिं गुलिखे मेमेगु सामान मीगु ज्या याइपिं खुद्रा व्यापारीतय्सं समेत हँय् ख्यें उथेंथुखें माला हयाः व्यापार शुरु याना हःगु खने दुगु दु। पिनें ख्यें मवयेवं स्थानीय बजारय् हे ख्यें मालेगु तीव्र जुया वंगु खः ।