पिने वःपिंसं नेवाःतय् नखः स्यंकाच्वन
येँ (सन्ध्या टाइम्स)/म्हपुजा यायेम्वाःपिंसं नेवाःतय् नखःचखः स्यंकाच्वंगु द्वपं नेपालभाषा एकेदेमीया चान्सलर व संस्कृतिविद् सत्यमोहन जोशीं बियादीगु दु। थौं सुथय् ज्यापु समाज यल युवा कवलं गःछेँ त्वालय् ग्वसाः ग्वःगु कौला ज्याझ्वलय् न्ववायेगु झ्वलय् उगु खँ धयादीगु खः। पिनें वःपिं गैरनेवाःतय् साइत स्वयेगु चलन दु तर नेवाःतय् छुं नं ज्या यायेत साइत स्वयेम्वाःगु खँ कनादिसें वय्कलं नेवाःतय् म्हपुजा वा किजापुजा यायेत साइत स्वयाच्वने म्वाःगु खँ कनादिसें नेवाःतय्सं थ्व निगुलिं पुजा बहनी लिबाक जक याइगु खँ धयादिल ।
ज्याझ्वलय् ज्यापु समाज यलया नायः रामकाजी अवालें नेवाःत छप्पँ जुयाः न्ह्याःवनेमाःगु आवश्यकतायात कुलादिसें वय्कलं नेपाल संवत्यात राष्ट्रिय संवत् कथं सरकारं मान्यता बीधुंकाः आः उकियात नेपाःन्यंकं छ्यलेमाःगु खँ धयादिल। गःछेँत्वाःया त्वाः नायः चन्द्रलाल महर्जनं लसकुस यानाः न्ह्याःगु उगु ज्याझ्वः किरण डंगोलया सभापतित्वय् जूगु खः ।
