प्रम व कोइराला माओवादीया तुच्चाय् अनुपस्थित
प्रमुख प्रतिपक्षी दल एकीकृत नेकपा (माओवादीं) नेपाल संवत् ११३० न्हूदँया लसताय् मंगलवाः छगू तुच्चा ज्याझ्वः याःगु दु । तुच्चा ज्याझ्वलय् थीथी ख्यःया आपलं मनूतय्सं ब्वति कासां प्रधानमन्त्री माधवकुमार नेपाल व नेपाल कांग्रेसया सभापति गिरिजाप्रसाद कोइराला धा:सा अनुपस्थित जुयादिल ।
प्रधानमन्त्री नेपालयात माओवादीं एमालेया वरिष्ठ नेता धकाः जक ब्वंगु व प्रधानमन्त्रीया ल्याखं ब्वनाः मतःगुलिं प्रधानमन्त्री अन अनुपस्थित जुयादीगु खँ सीदुगु दु । अथेहे कांग्रेस सभापति कोइराला धाःसा उसाँय् मदया तुच्चाय् ब्वति मकाःगु खँ सीदुगु दु ।
तुच्चाय् पत्रकारत लिसें खँल्हाबंला यानादिसें कांग्रेस कार्यवहाक सभापति सुशील कोइरालां राष्ट्रपतियात विवादीत दयेकीगु विषय बाहेक मेगू विषयलय् लचकता क्यनेत कांग्रेस तयार जूगु धयादिल । अथेहे माओवादी अध्यक्षं राष्ट्रपतियात विवादीत दयेकेत स्वयाःगु मखसें वयेकलं ल्ह्वंगु असंवैधानिक पलाः जक भिंकेमाःगु धयादिल । एमाले अध्यक्ष झलनाथ खनालं सहमति व सहकार्यया निंतिं एमाले न्ह्याःगु हे त्याग यायेत नं तयार जूगु धयादिल ।
माओवादीया तुच्चा ज्याझ्वलय् उपप्रधानमन्त्री सुजाता कोइराला, कांग्रेस कार्यवहाक सभापति कोइराला, संसदीय दलया नेता रामचन्द्र पौडेल, एमाले अध्यक्ष खनाल, राष्ट्रिय जनशत्ति पार्टीया अध्यक्ष सूर्यबहादुर थापा, राष्ट्रिय प्रजातन्त्र पार्टीया अध्यक्ष पशुपति शमशेर जबरा लगायात शीर्ष नेतात, कुटनीतिक नियोगया पदाधिकारी, मानव अधिकारवादी, नागरिक समाजया प्रधिनिधि, पत्रकार लगायतया उपस्थिति दुगु खः ।
