'चीनं प्रचण्डयात जिम्मेवार जुइत स्यनाः हल'

नेकपा (एमाले)या प्रभावशाली नेता केपी शर्मा ओलीं चीनं माओवादी अध्यक्ष पुष्पकमल दाहाल 'प्रचण्ड'यात जिम्मेवार जुइगु सुझाव बिया हःगु खँ धयादीगु दु ।

एमाले धनुषाया समानान्तर जिल्ला कमिटी गठन यायेत जनकपुरय् ग्वसाःग्वःगु भेलाया उल्लेज्या यानादिसें वयेकलं माओवादी अध्यक्ष प्रचण्डयात चीनं जिम्मेवारीया पाठ स्यंगु धयादिल । वयेकलं आः प्रचण्ड दरखास्त ज्वना भारत वनीगु व भारतं नं पाठ स्यनीगु दाबी यानादिल ।

ज्याझ्वलय् वयेकलं छुं नेतातय्सं पार्टीयात व्यक्तिगत हिसावं परिचालन यायेत स्वःगु द्वपं बियादिसें निर्वाचित पदाधिकारीयात चीकाः पादाधिकारीत नियुक्त यायेवं पार्टीया हितय् मजुइगु धयादिल । अधिकाशं ई पार्टी दुनेया विवाद व माओवादीया आचोलना यासें ई फुकादिम्ह नेता ओलीं माओवादी हठया कारणं संविधान निर्माण प्रकृया प्रभावित जूगु धयादिल ।