न्हूदँया लसताय् वृहत साँस्कृतिक जुलस

प्रम पाखें ने.सं.यात प्रचलनय् हयेत आयोग नीस्वनेगु प्रतिबद्धता

न्हूदँ ने.सं. ११३०या लसताय् नेपालभाषा मंकाः खलः न्हूदँ समारोह समिति - ११३०या ग्वसालय् जूगु वृहत साँस्कृतिक जुलसं येँ देय् चाहिलाः तःजिक हन । थीथी नेवाः साँस्कृतिक लूनापं येँया बसन्तपुलिं न्ह्याःगु उगु साँस्कृतिक जुलस मरु, न्हूघः, लगं, ब्रम्हत्वाः, ह्यूमत, क्वहिति, मरु जुयाः न्यत, त्यंगः, थाय्मरु, असं, जनबहाः, हनुमान ध्वाखा, लाय्कू जुयाः बसन्तपुलिइ क्वचाःगु खः ।

साँस्कृतिक जुलुस लिपा जूगु ज्याझ्वलय् सम्माननीय प्रधानमन्त्री माधव कुमार नेपालं मूपहां कथं ब्वति कयादीगु खः । न्हूदँ समारोह समितिया नायः नापं सभासद् तीर्थराम डंगोलया सभापतित्वय् न्ह्याःगु ज्याझ्वलय् नेपालभाषा मंकाः खलःया नायः पद्मरत्न तुलाधरं ३१ दँ न्ह्यः निसें न्ह्यानाच्वंगु साँस्कृतिक जुलुसं नेपाल संवत्यात मान्यता बीकेगु निसें नेपाल संवतया प्रणेता शंखधर साख्वायात राष्ट्रिय विभूति घोषणा नापं राष्ट्रिय संवतया कथं सरकारं मान्यता बी धुंकूसां नं नेपाल संवत्यात पूर्णता बी मानीगु धयादिल ।

वयेकलं बन्धन व दासतापाखें मुक्तिया सन्देश वियाच्वंगु थुगु संवत्यात गनं गुकथं ब्यवहारय् छ्यलेगु निंतिं सरकारं छगू उच्च स्तरीय कमिटी दयेका: अध्ययन यायेत माग यानादिल । अथेहे वयेकलं न्हूगु संविधानय् नेपाल संवत् छ्यलेगु धका: उल्लेख यायेत नं नेपाल सरकार नाप माग यानादिल ।

ज्याझ्वलय् मूपाहां सम्माननीय प्रधानमन्त्री नेपालं नेपाल संवत्या संरक्षण व संवद्र्धन यायेगु प्रतिबद्धता प्वंकादिल । वयेकलं संवत्यात प्रचलनय् हयेगु निंतिं मेमेगु दललिसे सहलह यानाः सरोकारवाला व विशेषज्ञत दुथ्याःगु छगू आयोग याकनं नीस्वनेगु नं प्रतिबद्धता प्वंकादिल ।

प्रधानमन्त्री नेपालं थुगु संवतं जातिय एकता, मित्रता व सद्भावयात क्वातुका यंकीगु नापं थुकिं हे नेपाःयात छधि छप्पं यायेत ग्वाहालि जुइगु खँ कनादिल ।

अथेहे उगु ज्याझ्वलय् प्रधानमन्त्री नेपालं नेपाल संवत् इमेज सिरपाः नेपाल संवत्यात कयाः अनुसन्धान यानाच्वनादीम्ह काशीनाथ तमोटयात लःल्हानादीगु खःसा सिरपाया कथं झिद्वः तका इमेज च्यानलया नाय: आर. के. मानन्धरं ल:ल्हानादीगु खः ।

अथेहे म्हिगः जूगु मचाब्वाज्या कासाय् न्हाप, ल्यू व लियांल्यू लाःपिंन्त नं प्रधानमन्त्री सिरपाः व दां ल:ल्हानादीगु खः । उगु मचा ब्वाज्याय् मिजंतय् पाखे सुनोज शाही, संजयलाल श्रेष्ठ व अनिल श्रेष्ठ अथेहे मिसामचा पाखे सम्झना शाही, सृजना लामा व कृतिका श्रेष्ठ छसिकथं न्हाप, ल्यू व लियांल्यू लाःगु खः ।

ज्याझ्वलय् साँस्कृतिक जुलसय् ब्वति काःगु बाजंयात ग्वाहालि कथं गोलाप्रथापाखें झिद्वः झिद्वः तका सिरपाः नं ब्यूगु खः । अथेहे नेवाः जागरण मञ्चया नायः सुजीव बज्राचार्यजुं प्रधानमन्त्री माधव कुमार नेपालयात लुमन्ति कथं शंखधर साख्वाःया मूर्ति देछानादीगु खः । ज्याझ्वः लिपा सिन्हः स्वां खलःपाखे साँस्कृतिक ज्याझ्वः नं न्ह्यब्वःगु खः ।