'नेपा:या शान्ति प्रकृया व संविधान निर्माणय् ग्वहालि यायेत चीन तयार'
एकीकृत (नेकपा) माओवादीया अध्यक्ष पुष्पकलम दाहाल 'प्रचण्डं' नेपा:या शान्ति प्रकृया व संविधान निर्माण यायेगु ज्यायात चीनं चसोपूर्व स्वयाच्वंगु धयादिसें थुकी न्ह्याःगु कथंया ग्वाहालि यायेत नं चीन तयार जूगु खँ धयादीगु दु ।
चीनया छवान्यंकया भ्रमण क्वचायेकाः सोमवा: त्रिभुवन अन्तराष्ट्रिय विमानस्थलय् संचारकर्मीत नाप खँल्हाबंला यानादिसें अध्यक्ष प्रचण्डं नेपाःया भूमि छ्यलाः तिब्बत व ताइवान विरुद्ध जुइगु गतिविधि प्रति चीनं च्यूताः प्वंकूगु व नेपाःया भूमिपाखें चीन विरोधी छुं नं गतिविधि जुइमबीत नेपाःया पाखें थम्हं प्रतिबद्धता प्वंकाःगु धयादिल ।
वयेकलं थःपिं सकारात्मक बिचाः ज्वनाः राजनीतिक सहमतिया निंतिं कुताः यानाच्वंसां मेमेगू दलत गम्भीर मजूगु द्वपं बियादिसें सहमति मजूसाः नागरिक सर्वोच्चताया निंतिं आन्दोलनय् वनीगुया विकल्प मदुगु धयादिल ।
चीन भ्रमणया बारे भारतीय संचारमाध्यमय् गलत टिका टिप्पणी जूगु खँय् आपत्ति प्वंकादिसें अध्यक्ष प्रचण्डं भारतं नं थःपिंतं सहलह यायेगु निंतिं इनाप यासाः भारत वनेत नं तयार जूगु खँ वयेकलं धयादिल ।
माओवादीया वरिष्ठ उपाध्यक्ष मोहन वैद्य 'किरण', विदेश विभाग प्रमुख कृष्णबहादुर महरा व काय् प्रकाश नापं चीन भ्रमणय् झायादिम्ह प्रचण्डं चिनियाँ राष्ट्रपति हु जिन ताउ नापं चिनियाँ कम्युनिष्ट पार्टीया उच्च नेतात नाप खँल्हाबंला यानादीगु खः ।
