न्हूदँया लसताय् राष्ट्रपति, प्रधानमन्त्री व नेतातय्सं भिंतुना

नेपाःया मौलिक संवत् नेपाल संवत् ११३० न्हूदँ क्यंगु लसताय् नेपाःया राष्ट्रपति, प्रधानमन्त्री व राजनीतिक दलया थीथी नेतातय्सं भिंतुना ब्यूगु दु ।

राष्ट्रपति डा. रामवरण यादवं नेपाल संवत् ११३०या लसताय् नेपाःमित दथुइ सुख, शान्ति व समृद्धिया कामना यानादीगु दु । वयेकलं न्हूदँया लसताय् नेपाःमित दथुइ सद्भाव कायम यानाः न्ह्याः वनेगु उर्जा दयेमाः धकाः नं भिंतुनादीगु दु ।

राष्ट्रपति यादवं सोमवाः पिथनादीगु विज्ञप्तिइ स्वदँ निसें झी न्हूगु संविधान निर्माण यायेगु महान अभियानय् दुगु झ्वलय् थीथी जातजाति, समुदाय व क्षेत्रया दक्वं नेपाःमित छगू हे नुगः, वचन व कर्मं जुया न्ह्यावनेमाःगु आःया आवश्यकता जूगु खँ न्ह्यथंनातःगु दु ।

अथेहे सोमवाः हे प्रधानमन्त्री माधवकुमार नेपालं नेपाल संवत् नेपाःया काय्मचा शंखधर साख्वाः नं हे पलिस्था याःगु ऐतिहासिक व मौलिक संवत् जूगुलिं थुकीया जगेर्ना व सम्बद्र्धन यायेगुलिं झी दक्वं नेपाःमित मिलेजुया न्ह्याः वनेमाः खँय् बः बियादीगु दु ।

वयेकलं नेपाल संवत् ११३० न्हूदँ पाखें नेपाःमित दथुइया एकता सद्भाव व मेलमिलापयात अझ क्वतुकाः शान्ति प्रकृयायात पूर्णता बीत व क्वछीनातःगु ईलय् हे न्हूगु संविधान निर्माण यायेगु ज्याये दक्वं केन्द्रीत जुया न्ह्याः वनेत प्ररित यायेफेमाः धकाः मनतुनादीगु दु ।

नेपाली कांग्रेसया सभापति गिरिजाप्रसाद कोइरालां शंखधर साख्वाः नं देशवासीतय् त्यासाः पुला यानादीगु परोवकारी ज्याया स्मृतिइ प्रारम्भ जूगु नेपाःया नेपाल संवत्या ऐतिहासिक महत्व दुगु धयादिल ।
वयेकलं नेपाल संवत्या प्रणेता शंखधर साख्वाः प्रति सम्मान प्रकट यानादिसें न्हूदँ दक्वं नेपाःमितय् निंतिं सुख, शान्ति व समृद्धिया दँ जुइमाः धकाः हार्दिक शुभेच्छा व भिंतुना प्वंकादीगु दु ।

एमालेया अध्यक्ष झलनाथ खनालं नं छगू विज्ञप्ति पिथंना नेपाल संवत् ११३०या लसताय् दक्वलं नेपाःमितय्त भिंतुना बियादीगु दु । वयेकलं विज्ञप्तिइ देश संक्रमणकाली ईलय् दुगु व न्हूगु संविधान निर्माणया ईलय् दुगुलिं दक्वसिनं थःथःगु अडान त्वःताः सहमतिलय् वयेत इनाप यानादीगु दु ।

थ्वहे दथुइ राष्ट्रिय जनशक्ति पार्टीया अध्यक्ष सूर्यबहादुर थापां नेपाल संवत् ११३० न्हूदँलय् शान्ति, स्थायित्व व समृद्धि कायम यायेत दक्वं नेपाःमितय्त हौसला, प्रेरणा व सद्बुद्धि प्रदान यायेमाः धकाः मनंतुनादीगु दु । वयेकलं देश संक्रकमणकालीन अवस्थाय् दुगु अवस्थाय् सही परिचालन यानाः देशय् बल्लाःगु शान्ति, स्थायित्व कायम यासें न्हूगु संविधान निर्माणया दायित्व राजनीतिक शक्तिया ब्वलय् वःगु खँ धयादीगु दु ।

(किपा - जुजुमान महर्जन)