तःजिक हनाच्वन न्हूदँ
नेपाः देय् न्यंक व विदेशया थीथी थासय् नेपाल संवत् ११३० न्हूदँ थीथी ज्याझ्वःलिसे हनाच्वंगु दु । नेपालभाषा मंकाः खलः न्हूदँ समारोह समिति -११३० या ग्वसालय् नकतिनि सुथय् ६:३० बजे येँया बसन्तपुरं सांस्कृतिक र्याली न्ह्याःगु दु । थ्व र्यालीं नगर परिक्रमा यानाः बसन्तपुरय् जुइगु सभाय् प्रधानमन्त्री माधवकुमार नेपालं संवोधन याइगु जूगु दु । अथेहे यलया मंगल बजारं तःधंगु सांस्कृतिक जुलुस न्ह्याःगु दुसा ख्वप, थिमि, किपू आदि थासय् जुलुस पिकायेगु तयारी जुयाच्वंगु दु ।
राष्ट्रिय विभूति शंखधर साख्वाः प्रतिष्ठान मध्यपुर थिमिया ग्वसालय् ७:३० बजे थिमिस्थित शंखधर चोकय् दुगु नेपाल संवत् प्रवर्तक राष्ट्रिय विभूति शंखधर साख्वाःया झ्वाताय् प्रधानमन्त्री माधवकुमार नेपालपाखें माल्यार्पण यायेगु ज्याझ्वः तयातःगु दु ।
थौं न्हिनय् गंगा क्लबया ग्वसालय् बसन्तपुरं भिंतुना मोटरसाइकल र्याली व खास्ती नेवाः पुचःया ग्वसालय् बौद्ध चैत्यं मोटरसाइकल र्याली न्ह्यायेत्यंगु दु ।
(किपा- रायस नेवाः)
