प्रतिसरायात श्रेष्ठ सिरपाः
येँ (सन्ध्या टाइम्स)/नेपालभाषा साहित्य ख्यःया अतिकं नांजाःगु श्रेष्ठ सिरपाः कवयित्री प्रतिसरा साय्मियात बीगु जूगु दु ।
वय्कःया कविता सफू 'तिकिनंगु मि' या लागिं थ्व सिरपाः बीत्यंगु खः। श्रेष्ठ सिरपाः नांजाःगु संस्था च्वसापासापाखें बीगु खः ।
नेपाल संवत् ११२१ निसें ११२६ तक पिहां वःगु काव्य कृतिया मूल्यांकनया लिधंसाय् वय्कःयात थ्व सिरपाः बीगु क्वःछिउगु खः। थ्व अवधि दुने ३८ म्ह च्वमिपिनि ६५ गू काव्य सफू पिहां वःगु दु। 'तिकिनंगु मि' नेसं ११२१ य् पिहां वःगु खः ।
थुगु सिरपालय् न्यय्द्वः तका दां व दसिपौ दइ। आः याकनं हे छगू ज्याझ्वः यासें थुगु सिरपाः लःल्हायेगु खँ च्वसापासां धाःगु दु। सिरपाः घोषणा जूगु थुगु इलय् कवयित्री साय्मि धाःसा दुबई झाया च्वनादीगु दु ।
मदुम्ह साहित्यकार स्वयम्भुलाल श्रेष्ठं थुगु सिरपाः नीस्वनादीगु खः। नेपालभाषाय् अतिकं प्रतिस्थां जाःगु थ्व सिरपाः नेपालय् हे जनस्तरपाखें नीस्वंगु दकलय् न्हापांगु सिरपाः खः ।
