न्हूपुचःया मचा ब्वाज्या कासा
येँ (सन्ध्या टाइम्स)/नेपाल संवत् ११३० न्हूदँया लसताय् न्हू पुचः भिंद्यः त्वाःया ग्वसालय् थौं सुथय् छगू मचा ब्वाज्या कासा जुल ।
न्यादँनिसें झिदँ तकया मस्तय् दथुइ जूगु उगु कासाया उलेज्या न्हूदँ समारोह समिति-११३० या नायः नापं सभासद तीर्थराम डंगोलं रिबन चानाः यानादीगु खः ।
थनया बसन्तपुलिं न्ह्याःगु कासा न्हूसतक, सिद्धिचरण चुक, ओमबहाः, यंगाः, लगं, क्वहिति, जुयाः भिंद्यः त्वालय् थ्यंकाः क्वचायेकूगु खः ।
मिसा व मिजंतय् निगू बिस्कं कथं जूगु कासाय् मिजंतय्पाखे १२० म्ह व मिसातय्पाखे ९८ म्ह मस्तय्सं ब्वति काःगु खः।
पुचःपाखें दँय्दसं न्हूदँया लसताय् याना वयाच्वंगु थुगु कासा थुगुसी झिंस्वक्वःगु खः ।
पुचःया दुजः मनरत्न शाक्यया संयोजकत्वय् जूगु थुगु कासाय् त्याःपिं मस्तय्त कन्हय् बसन्तपुली जुइगु न्हूदँया सार्वजनिक ज्याझ्वलय् सिरपाः लःल्हाइ ।
