मन्दः च्वज्या कासा

यलया युवक बौद्ध मण्डल नेपालपाखें दँय्दसं याना वयाच्वंगु मन्दः च्वज्या धेंधेंबल्लाः कासाय् दकलय् बांलाःगु मन्दः च्वयाः मय्जु निर्जला ताम्राकार न्हाप लाःगु दु ।

म्हिगः सुथय् जूगु कासाया लिच्वः म्हिगः हे सनिलय् पिहां वःगु खः। कासाय् लिउ सिरपाः रुबिन शाक्यं त्याकादीगु दुसा लियांलिउ सिरपाः विशाल शाक्यं त्याकूगु खः। अथे हे हःपाः सिरपाः संगीता शाक्य व संजीव शाक्यं त्याकूगु दु ।

यलया थीथी थासं वःपिं १२ म्ह कासामितय्सं धेंधेंबल्लाखय् ब्वति काःगु खः। उकी मध्यय् प्यम्ह जक मिसापिं खःसा कासाया न्हापा सिरपाः नं मिसाम्ह हे कासामिं त्याकूगु दु।
कासाय् दकलय् क्वकालिम्ह कासामि कथं थैनाया झिदँ दुम्ह सन्देशराज शाक्यं ब्वति काःगु खः ।

कासाया निर्णायक समितिइ राजकुमार शाक्य, भीमरत्न शाक्य, लोक चित्रकार व बत्सगोपाल वैद्य च्वनादीगु खः।
म्हिगः हे सुथय् न्हूदँ समारोह समिति-११३० या नायः व सभासद् तीर्थराम डंगोलं छगू ज्याझ्वःया दथुइ उगु कासाया उलेज्या यानादीगु खः। युवक बौद्ध मण्डल, नेपालया अध्यक्ष हिरारत्न शाक्यया सभापतित्वय् जूगु उगु ज्याझ्वलय् कासाया संयोजक सनी शाक्यं लसकुस यानादीगु खः।
कासाय् त्याःपिं सकसितं म्हिगः हे सिरपाः लःल्हायेगु ज्या जूगु खः ।

न्हूदँया लसताय् नेपालभाषा मंकाः खलः यलया इनाप कथं युवक बौद्ध मण्डल, नेपाल, क्लब २५ या ग्वसालय् यलया इटी त्वालय् उगु कासा जूगु खः ।

न्हूदँया लसताय् यलय् जुइगु मन्दः च्वज्या कासा छगू मौलिक ज्याझ्वः खः। थुगुसी जूगु थ्व कासा झिंन्याक्वःगु खः। कासाय् च्वःगु मन्दः स्वन्तिजःछि ब्वया तइगु ग्वसाः दु ।