नेवाः स्वायत्तताया लागिं येँ-यल वाकाथोन
येँ (सन्ध्या टाइम्स)/नेवाः स्वायत्त राज्ययात संस्थागत यायेत नेवाः देय् गुथि नेपालमण्डलपाखे म्हिगः सुथय् येँय् लाय्कू हनुमानध्वाखानिसें यल लाय्कू मंगः तक वाकाथोन ज्याझ्वः यात ।
नेपाल संवत् न्हूदँ ११३० या लसताय् जूगु उगु ज्याझ्वः नेकपा (माओवादी)या उपाध्यक्ष नारायणकाजी श्रेष्ठं हनुमानध्वाखाय्च्वंगु तग्वःगं थानाः न्ह्याकूगु खः। ज्याझ्वलय् आपालं नेपालभाषाया कार्यकर्ता लिसें गैर नेवाःत यानाः न्याद्वलं मयाक मनूतय्सं ब्वति काःगु खः।
येँया हनुमानध्वाखां वंघः, न्हूसतक, त्रिपुरेश्वर, थापाथली कोपुण्डोल, यलध्वाखा जुयाः मंगलय् क्वचायेकूगु उगु ज्याझ्वलय् थीथी राजनीतिक पार्टीया नेतातय्सं नं ब्वति काःगु खः ।
ज्याझ्वः यल ध्वाखाय् थ्यंकाः ज्यापु समाज यल, नेपालभाषा मंकाः खलः यल, नेवाः देय् गुथि नेपालमण्डल यलया क्षेत्रीय कमिटी व नेवाः स्वायत्त राज्य मंकाः संघर्ष समितिया क्षेत्रीय समितिं तःजिक लसकुस याःगु खः।
मंगःया कात्ति दबुली थ्यंकाः सभाय् हिउगु उगु ज्याझ्वलय् सहभागि सकसितं देय् गुथिया न्वकु किरण शाक्य लसकुस यानादीगु खः। ज्याझ्वलय् ज्यापु समाज यलया नायः रामकाजी अवालें न्ववानादीगु खः ।
ज्याझ्वलय् ब्वति काम्ह मध्ये छम्हेसित येँ-बैंकक-बैंकक-येँ तकया टिकट सिरपाः नं घोषणा याःगु खः। घोषणा कथं विजय रञ्जितयात उगु सिरपाः लाःगु खः । नेवाः स्वायत्त राज्यया माग यानाः याःगु थ्व न्हापांगु वाकाथोन ज्याझ्वः खः ।
नेवाः स्वायत्त राज्य स्थापना यायेगु निंतिं थ्व छगू कथं नेवाःतय् शक्ति प्रदर्शनं व नेवाः मार्च पास जूगु गुथिया धापू दु।
वाकाथोन ज्याझ्वलय् 'न्हूदँया भिंतुना नेवाः स्वायत्त राज्यया मन्तुना' नेवाः स्वायत्त राज्य जिन्दावाद लिसें थीथी नारा थ्वयेकूगु खः ।
