लिपि गुथियात शंखधर सिरपाः लःल्हात
येँ (सन्ध्या टाइम्स)/नेवाःतय्सं आः थःगु जातीय अस्तित्वया निंतिं आन्दोलन न्ह्याकेमाः। थ्व खँ शुक्रवाः लिपि गुथिया पिथना तिथि म्हिचापौयात ११२९ दँया शंखधर सिरपाः लःल्हासें सामान्य प्रशासन मन्त्री प्रभाकर प्रधानांग (रवीन्द्र श्रेष्ठं) धयादीगु खः। शंखधर सिरपाः समितिया ग्वसालय् नगदेशया गणेश माविइ जूगु ज्याझ्वलय् मन्त्री प्रधानांगं लिपि गुथिया नायः शरद कसाः 'कसाःछेँ' यात सिरपाः कथं हनापौया लिसें ११,०२९/- तका दां नं लःल्हानादिल ।
ज्याझ्वलय् न्ववायेगु झ्वलय् नेपाल संवत् न्हूदँ समारोह समिति ११३० या नायः व सभासद् तीर्थराम डंगोलं नेवाःतय्गु संस्कृति बल्लाःगुलिं पृथ्वीनारायण शाहं नेपाः त्याकूसां नेवाःतय्त त्याके मफुगु खँ कनादिल ।
समितिया छ्याञ्जे गणेशराम लाछिं लसकुस यानाः न्ह्याःगु ज्याझ्वलय् समितिया दुजःपिं तेजेश्वरबाबु ग्वंगः, डा. पुष्पराज राजकर्णिकार, नेवाः देय् दबूया नायः नरेश ताम्रकार, नेवाः गुथिया नायः पवित्र वज्राचार्य व लिपि गुथिया नायः शरद कसाः 'कसाः छेँ'पिंसं थःथःगु नुगः खँ प्वंकादीगु खः ।
ज्याझ्वलय् सभापतिया थासं न्ववायेगु झ्वलय् नेपालभाषा मंकाः खलःया नायः पद्मरत्न तुलाधरं विश्वय् मेमेगु जातिं विकास हे मयाःनिबलय् नेवाःतय्सं नकिं छथु हे मताःसे अपाय्धंगु बुंगःद्यया खः दयेके धुंकल, तर थौं नीछगुगू शताब्दी थ्यने धुंकाः धाःसा नेवाःतय्सं साइकल छगू हे दयेके मसये धुंकूगु खँ कनादिल ।
ज्याझ्वलय् समितिया दुजः गणेशराम लाछिं च्वयादीगु 'शंखधर सिरपाः गुकथं पलिस्था जुल' नांगु सफूया विमोचन नं मन्त्री प्रधानाङ्गं यानादीगु खः ।
