तुच्चा ज्याझ्वलय् 'माःचाः' पिदन
येँ (सन्ध्या टाइम्स)/न्हूदँ ११३० या लसताय् ओलम्पस क्लबं दँय्दसं थें थुगुसी नं ओमबाहाःया नःबहिली छगू तुच्चा ज्याझ्वः यात। ज्याझ्वलय् सुवर्ण शाक्यया बाखं सफू 'माःचाः' नं विमोचन जूगु खः। न्हूदँ समारोह समिति - ११३० या नायः एवं सभासद् तीर्थराम डंगोलं उगु सफू विमोचन यानादीगु खः ।
क्लबया नायः पवित्र वज्राचार्यया सभापतित्वय् जूगु उगु ज्याझ्वलय् ज्योति शाक्यं लसकुस यानादीगु खःसा रोशन शाक्यं सुभाय् देछानादीगु खः। विमोचित सफूयात कयाः प्रा. नर्मदेश्वर प्रधान, फणिन्द्ररत्न वज्राचार्य, लक्ष्मण राजवंशी व च्वमि सुवर्ण शाक्यं न्ववानादीगु खः ।
क्लबया ग्वसालय् प्यन्हु तक जूगु आधारभूत प्राथमिक उपचार तालिमय् सहभागी २८ म्ह प्रशिक्षार्थी व प्रशिक्षकतय्त लुमंति चिं व उकिया समन्वय याःगु नेपाल रेडक्रस गणबाहाः उपशाखायात सुभाय् नं लःल्हाःगु खः ।
