भक्तपुर शैक्षिकया तुच्चा ज्याझ्वः
ख्वप (सन्ध्या टाइम्स)/ नेवाःतय्गु संस्कृति परम्परा व संस्कारयात न्हंकेगु व नेवाः नेवाःया दथुइ फायेगु व ल्वाकेगु षडयन्त्र याइपिनिगु पर्दाफास यासें सकलें नेवाःत सजग व सचेत जुइमाःगु थौंया आवश्यकता जूगु खँ न्हूदँ समारोह समिति - ११३० या नायः व सभासद् तीर्थराम डंगोलं धयादीगु दु ।
नेपाल संवत् ११३० न्हूदँया लसताय् वंगु कौलागा १३, शुक्रवाः कुन्हु भक्तपुर बौद्ध शैक्षिक संघया ग्वसालय् जूगु भिंतुना कालबिल व तुच्चा ज्याझ्वलय् न्ववासें वय्कलं थ्व खँ धयादीगु खः ।
संघया ग्वसालय् ख्वपया ऐतिहासिक विहार झौरबहिली संघया नायः मणिरत्न शाक्यया सभापतित्वय् उगु तुच्चा ज्याझ्वः जूगु खः। लिसें वय्कलं चन्द्रमास कथंया नेपाल संवत् कथं कार्तिक १,२ व ३ गते हे लक्ष्मीपुजा, म्हपुजा व किजापुजा नखः हनेमाःगु खँ नं कनादिल ।
उगु तुच्चा ज्याझ्वलय् विराट गुथिया नायः त्रिरत्न शाक्य, नेपाल साहित्य मन्दिरया नायः साहित्यकार तिलक कायस्थ, मैत्रेय युवा संघ, युवा बौद्ध पुचः, बौद्ध सम्पदा संघ, बौद्ध परम्परा संघ व नेपालभाषा तःमुँज्याया नायःपिंसं नं नेपाल संवत् व थुकिया राष्ट्रिय महत्व बारे न्ववासें कार्तिक १,२ व ३ गते हे स्वन्त नखः हनाः पञ्चाङ्ग समितियात हाथ्या बीत इनाप यानादीगु खः। संघया दुजः लिसें तुच्चा ज्याझ्वःया कजि प्रदिप शाक्यं लसकुस यासें ज्याझ्वः न्ह्याकादीगु खः ।
ख्वप जिल्लाया मध्यपुर थिमिइ कन्हय् सुथय् शंखधर साख्वाःया झ्वाताय् स्वां देछायाः न्हूदँ हने प्रधानमन्त्री माधव नेपाल झाइगु जूगु दु ।
